Në mjediset e Ministrisë së Energjisë u firmos këtë të martë marrëveshja mes qeverisë shqiptare dhe asaj gjermane, që siguron financimin e projektit të lidhjes energjitike 400 kV mes Shqipërisë dhe Maqedonisë.
Për palën shqiptare dokumenti u firmos nga ministri Damian Gjiknuri, ndërsa për palën gjermane nga ambasadorja Susanne Schutz.
“Bëhet fjalë për një nga projektet jashtëzakonisht të rëndësishëm të ndërlidhjes, një axhendë që tanimë siç dihet mbështetet edhe nga procesi i Berlinit. Janë siguruar të gjitha financimet e nevojshme dhe procesi po ecën në rrugë të mbarë”, theksoi ministri Gjiknuri.
Zbatimi i projektit në territorin shqiptar ka një kosto prej 70 milion Euro. Punimet do të financohen nëpërmjet një skeme ku kombinohen fonde grant në shumën 14 milion Euro, të Bashkimit Evropian.
