Katër persona janë arrestuar gjatë një super-operacioni të zhvilluar nga Sektori i Antidrogës dhe Krimet e Rënda.
Mësohet se të arrestuarit janë pjesë e një grupi të trafikut të drogës, ku transportonin lëndë narkotike nga Shqipëria në Gjermani.
Trafikantëve u janë sekuestruar armë dhe një makinë e blinduar me targa ruse.
Katër të arrestuarit janë, Elvis Gaçaj 44-vjeç, Oltion Loga, 38-vjeç, Dritan Agaj, 38-vjeç dhe Leonard Duka, 33-vjeç të gjithë banues në Tiranë.
Më herët një nga të arrestuarit, E.G, ka qenë objektiv i një atentati tek ‘Lulishte 1 Maji’ në Tiranë, ku mbetën të vrarë dy persona, ndërsa ai u plagos.
Njoftimi i plotë:
Bashkëpunimi me qytetarët për të luftuar krimin vë në pranga katër shtetas për “Prodhim dhe mbajtje pa leje të armëve e municionit luftarak” dhe “Prodhim dhe shitje lëndësh narkotike”.
Sekuestrohen mjet i blinduar, armë zjarri pistoletë, municion luftarak dhe një sasi e dyshuar lënde narkotike.
Seksioni i Forcës së Posaçme të Operacioneve Speciale dhe Kërkimit në bashkëpunim me Seksionin për Hetimin e Krimeve të Rënda ndaj Jetës në D.V.P Tiranë, pas informacioneve të siguruara në rrugë operative për disa persona që dispononin armë e drogë, arrestoi në flagrancë shtetasit:
- L. D., 33 vjeç, banues në Tiranë;
- D. A., 38 vjeç, banues në Tiranë;
- O. L., 38 vjeç, banues në Tiranë;
- E. G., 44 vjeç, banues në Tiranë.
Policia ka ushtruar kontroll në banesën me qera ku këta shtetas jetonin, pasi dispononte nga qytetarët informacion se këta shtetas mbanin në banesë sende të kundraligjshme.
Gjatë kontrollit të ushtruar këta shtetas janë munduar të largojnë sendet e kundraligjshme duke hedhur një pjesë të tyre nga ballkoni i banesës.
Policia sekuestroi në cilësinë e provës materiale:
– Një mjet të blinduar;
– Një armë zjarri pistoletë me krehër me fishekë;
– 46 fishekë luftarak, si dhe doza me lëndë narkotike kanabis.
Në bashkëpunim me Prokurorinë vijon puna për dokumentimin e plotë të veprimtarisë kriminale të tyre, si dhe të përfshirjes të personave të tjerë.
Materialet do ti kalojnë për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale të “Prodhimit dhe shitjes së lëndëve narkotike” dhe “Prodhim dhe mbajtja pa leje e armëve e municionit luftarak e kryer në bashkëpunim”, parashikuar nga nenet 283 dhe 278/25 të Kodit Penal.
