Lidhur me vrasjen e ish-gjyqtares Fildez Hafizi nga ish-bashkëshorti i saj, ka reaguar ish-deputetja e PD Majlinda Bregu e njohur për deklaratat e saj pro grave dhe kundër dhunës.
Me anë të një statusi në “Facebook”, Bregu kërkon nisjen e vettingut si dhe i ka bërë thirrje ministres së re të Drejtësisë, të kërkojë llogari të gjitha gjykatat e drejtoritë e burgjeve për këto raste, kjo pasi 39-vjeçarja e vrarë sot ishte me urdhër mbrojtjeje nga ish-bashkëshorti.
Statusi i Bregut
Ka dalë nga burgu me amnisti në 2016?!
Është dënuar për dhunë në familje, ka tentuar ta vrasë në 2015 dhe lirohet në 2016 për ta vrarë nënën e tre fëmijëve në 2017?!
Fillojeni Vettingun nga vendimet për krimin në familje!
Urdhra mbrojtje të mohuara, të dhëna e të paekzekutuara, tentativa vrasje të amnistuara! Prokurorë pijanecë, gjyqtarë druvarë, ekspertë mashtrues!
Bëni publik emrin e nisni hetimin për prokurorin që kanosjen me armë të atij që vrau nënën e fëmijëve sot e pa si armëmbajtje pa leje!
Fillojeni Vettingun këtu! Për krimin më makabër që po shfaros gra e nëna përditë!
Lëviz Etilda!
Kërko të të japin llogari qysh ditën e parë pa u zbardhur mirë dita të gjithë gjykatat e drejtoritë e burgjeve për urdhrat e mbrojtjes, lirimet me kusht, kohën e apelimit, ekspertët pranë gjykatave! Hiqeni nga lista e amnistisë tentativën për vrasje e për me tepër ndaj nënës së fëmijëve!
Hiqini të drejtën e përfitimit nga ulja e dënimit çdo lloj dhunuesi grash e fëmijësh!
Nuk i mbron dot urdhri i mbrojtjes nëse nuk ashpërsohen vendimet kundër dhunuesve!
Nuk mbrojti dot as një nënë gjyqtare! Nuk funksionoi drejtësia as për të bërë drejtësi për një grua e cila gjyqtaret që duhet të bënin seancën për një vepër të kryer në kushtet e flagrancës e kishin kolegë!!!
Po vrasin gratë e nënat përditë e ditën për diell! Dhe po bëhet kaq e zakontë sa as ndjeshmëri as përgjegjësi nuk po mban askush! Kjo është luftë! Në luftë o vritesh, o të vrasin!
