Vendimi pas urdhërit të gjykatës për “arrest shtëpie” për kancelaren
Kancelarja e Gjykatës së Apelit në Durrës, Suzana Mandija është në arrest shtëpie. Vendimi është dhënë nga Gjykata e Shkallës së Parë për Krimet e Rënda në Tiranë. Pas këtij vendimi, Ministri i Drejtësisë Ylli Manjani, ka vendosur shkarkimin e saj nga detyra, duke i hapur kështu rrugë hetimeve.
Suzana Mandija, 58 vjeçe, banuese në Durrës, kancelare pranë Gjykatës së Apelit Durrës akuzohet për për veprën penale të “Korrupsionit pasiv i gjyqtarëve, prokurorëve dhe funksionarëve të tjerë të drejtësisë”. Sipas policisë Mandija ka ndikuar në hedhjen e shorteve elektronike. “Ekzekutimi i këtij vendimi është bërë në bazë të një hetimi disa mujor, të ndjekur me metoda speciale, nga ana e Drejtorisë për Hetimin e Krimit Ekonomik dhe Financiar, në bashkëpunim me Prokurorinë pranë Gjykatës së Shkallës së Parë për Krimet e Rënda Tiranë, ku është bërë e mundur dokumentimi i veprimtarisë korruptive, të shtetases së mësipërme”, sqaron policia e Durrësit.
