Festa e Fiter Bajramit ka gjetur familjen myslimane Fasku në një shtëpi të dëmtuar rëndë nga tërmeti i 26 Nëntorit 2019 dhe me sofrën bosh.
Kryfamiljarja Afdije Fasku ka bërë apel në “FaxNews” që të gjithë shqiptarët që kanë mundësi ta ndihmojnë me ushqime, ndërsa gjithashtu i bëri apel pushtetit lokal për një banesë modeste që fëmijët të flenë si gjithë te tjerë.
“Në radh të parë uroj besimtarët mysliman gëzuar Fiter Bajramin, allahu ua pas pranu agjërimin, dua-at dhe ibadetin. Unë jam Afdije Fasku, jam nënë e 3 fëmijëve. Tërmeti na ka dëmtuar edhe më shumë shtëpinë, pasi që para tërmetit shtëpia ka qënë e pabanueshme.
Shtëpia nuk është e imja, jam fut nga komshijtë që e kanë liruar këtë shtëpi sepse isha shumë ngusht. Tërmeti më dëmtoi rëndë shtëpinë, kryetari komunës e vërtetoi që shtëpia ishte e pabanueshme, por nuk më ndihmonte dot.
Letrat i kam cu në bashki, nuk e kemi përfituar dot sepse jemi burrë e gru pa punë. Jo sepse nuk duam të punojmë, por jemi të paaftë për të punuar. Im shoq ka probleme shëndetësore të rënda, gjithashtu dhe unë. Unë personalisht jam me tuberkuloz në zemër, kam dhe një cist mbas koke që ka dalë tumorale dhe më ka dëmtuar syrin e majtë, jam me hernie diskale që doktori më ka thënë të operohem por skm mundësi.
Im shoq ka qënë bojaxhi dhe nga toksikat e bojrave pësoi helmim të trupit, deformim të pankreasit që i dëmtoi të gjithë organet. Tani i ka dalë problem me veshkat dhe i është zvogëlu, i kanë thënë për ndërhyrje, kemi bërë ekon dhe ka rezultuar se ka venat e bllokuara. Por rezonanca i bën dëm dhe mund tia nxjerri jashtë funksionit të dyja veshkat. E ka të pamundur të punojë.
Jetojmë me përkrahjen sociale, marrim 50 milek dhe nuk kemi të ardhura të tjera. Pension nuk kemi përfituar as unë as im shoq sepse nuk kemi siguracion.
Jetoja me dy prindërit e tim shoqi, babai i tim shoqi s’ka shumë që ka ndërruar jetë. Kishte një problem me zemrën, me aortën për të cilën nuk kishim të ardhura ta kuronim. Pësoi infrakt nuk ka shumë, ditën e parë të ramazanit.
Edhe mamaja e tim shoqi ka një problem serioz, stomaku sëmundje e pashërueshme. Edhe atë e presim nga dita në ditë.
Mbrëm filloi shiu, i jam lut zotit, o zot thash shiu të bjerë në kodra e në fusha se skanë ku të flejnë fëmijët. Unë e di si këmi bërë në dimër. Mësueset e fëmijëve na kanë blerë këtë sobën që të mos kishte lagështi.
Unë shkova të marr bonus qiraje dhe mora një përgjigje negative nga kryetari komunës, di të them që na ka pritur keq. Falenderoj të gjithë ato që më kanë shti dorë, ua shti zoti me mirësi te ta. Kush ka mundësi me na ndimu të na ndihmojë.
Pushtetit lokal i bëj thirrje që shtresën tonë që jemi në pamundësi nga të gjitha anët të na japin një banesë modeste ku të gjithë fëmijët e mi të flenë si gjithë fëmijët e tjerë. Kush ka mundësi të më ndihmojë për shtëpinë, zoti jua shpërbleftë.”, u shpreh Fasku./faxweb.al
