KQZ ka vendosur sot regjistrimin e partisë Bindja Demokratike në zgjedhjet e 30 qershorit.
Kërkesës për regjistrim të “Bindja Demokratike”, iu përgjigjën pozitivisht 4 përfaqësuesit e mazhorancës socialiste në KQZ, ndërkohë që i vetmi që votoi kundër ishte kryetari i KQZ, Klement Zguri.
Gjatë mbledhjes së sotme, Komisioni gjithashtu i ka dhënë mandatin e deputetit kandidatit të LSI-së për qarkun e Beratit, Klajdi Qama.
Në rendin e ditës ishte njoftuar dhe mandatimi i Qamës i cili e çon në 14 numrin e deputetëve të LSI-së në Kuvendin e Shqipërisë, pas dorëzimit të mandateve të deputetëve të këtij grupi parlamentar. Numri total i deputetëve në Kuvend arrin në 110, ndërsa mbeten bosh dhe 30 mandate të tjera nga opozita.
Kujtojmë se dje qytetarët kanë denoncuar rastin se si Astrit Patozi, kreu i partisë “Bindja Demokratike” i ka falsifikuar firmat e tyre për të rritur numrin e pjesëmarrësve në këtë parti.
