Eurodeputetja Tanja Fajon ka deklaruar se zgjedhjet e 18 Qershorit janë legjitime edhe pa PD.
Gjatë një interviste për DW, Fajon shprehet se bojkoti i Parlamentit nga ana e opozitës në Shqipëri është tejet shqetësuese.
“Zhvillimi i zgjedhjeve parlamentare të 18 qershorit pa PD-në dhe parti të tjera opozitare është legjitim, po kështu do të jenë legjitime edhe rezultatet e tyre. Por këmbëngul që nuk është mirë për stabilitetin e qëndrueshëm politik të Shqipërisë që ato të zhvillohen pa PD-në, pa opozitën“, tha Fajon.
Fajon tha se pjesëmarrja e opozitës në zgjedhje do të sigurojë stabilitet afatgjatë.
“Situata në Shqipëri me bojkotin e parlamentit nga opozita është shumë shqetësuese. Lidhur me bojkotin e parlamentit, propozimi është ende në tavolinë për një marrëveshje mes qeverisë dhe opozitës, që u ofrua nga kolegët e mi euro-parlamentarët McAllister dhe Fleckenstein. Mbetet një ofertë e mirëekuilibruar dhe gjithëpërfshirëse. Për marrëveshje mes palëve po vazhdohet të punohet.
Përherë është në dorë të politikanëve të përgjegjshëm të gjejnë mënyra për të zgjidhur krizën, të vënë interesat e qytetarëve mbi interesat personale dhe të punojnë për të mirën e vendit“, tha Fajon.
