Deputetja e BDI-së, Ermira Mehmeti, ka reaguar pas akuzave se ishte fajtore që u miratua rezoluta kundër Kosovës në AP të Këshillit të Europës, ngaqë nuk mori pjesë në seancë.
Në një postim në Facebook, Mehmeti e pranoi se ka ikur përpara zhvillimit të seancës pasi nuk kishte mundësi të blinte biletë avioni tjetër dhe ka shtuar se nuk i është kërkuar të rrinte as nga delegacioni i Shqipërisë dhe as nga ai i Kosovës.
“Për fat të keq, nuk e kam standartin e disa politikanëve shqiptarë, ish-ministra e zyrtarë të tjerë të shtetit, që të mund t’i lejoj vetes që me shpenzime private të paguaj bileta avioni. Kjo mbase është dobësia ime që vazhdoj të jetoj vetëm nga rroga e deputetit dhe vazhdoj të mos kem asnjë biznes privat, të mos kontrolloj asnjë tender dhe që refuzoj të korruptohem”, ka shkruar Mehmeti.
Sipas saj, ajo nuk është shefe e delegacionit të Maqedonisë dhe për rrjedhojë as nuk e cakton kohëzgjatjen e qëndrimit në Strasburg, ndërsa shton se këtë gjë, ndryshimin e orarit të fluturimit, nuk ia ka kërkuar askush, as delegacioni i Kosovës, as i Shqipërisë, pasi sipas saj, nëse kjo kërkesë do të parashtrohej në nivel politik ndoshta edhe kishte mundësi të rregullohej me shefin e delegacionit maqedonas.
“Ishte puna dhe lobimi im, që siguroi mbështetjen më të madhe të delegacioneve, ndër më kryesoret, përfshirë Gjermaninë dhe Britaninë e Madhe, të cilët, duke firmosur amandamentet e palës kosovare, në fakt, arritën të ndryshonin atmosferën në favor të Kosovës. Mes të tjerash, këtu do përmendja edhe biseden telefonike me iniciative timen, me ministrin e Jashtëm të Turqisë, z. Mevlut Causoglu, i cili më ka garantuar mbështetjen e plotë të delegacionit turk në Asamble. Kam komunikuar disa herë me njërin nga deputetet me më ndikim në Asamble, austriakun z. Stefan Schennach, deri sa është bindur dhe ai për të firmosur amandamentet kosovare”, vijon Mehmeti.
/27.al/
