Kryebashkiaku inspekon punimet e rikonstruksionit të kopshteve
Bashkia e Tiranës ka në plan të ndërtojë edhe 11 kënde të tjera lojrash për fëmijë në lagjet e kryeqytetit. Kryebashkiaku Erion Veliaj ka deklaruar sot se ai është i vendosur të ndërtojë si këndin e madh te Liqeni ashtu edhe 11 kënde të tjera, pasi sipas tij fëmijët janë një prioritet. Veliaj ka thënë se për Bashkinë e Tiranës të gjithë qytetarët janë të rëndësishëm, por fëmijët janë ata që kanë prioritet mbi gjithçka. “Ne nuk duhet të zgjedhim mes një këndi të madh lojërash apo këndeve të vogla nëpër lagje. Ne do të bëjmë, edhe këndin e madh, edhe këndet e vogla nëpër lagje, sepse besojmë që nuk duhet të kursejmë asnjë mundësi që kemi që fëmijët e Tiranës të kenë një fëmijëri që ja vlen të mbahet mend”, ka thënë kryetari i Bashkisë.
Deklaratën e tij Veliaj e bëri gjetë nisjes së punimeve për rikonstruksionin e një kopështi fëmijësh. “Ky është viti i parë që Bashkia e Tiranës ka marrë në administrim, jo vetëm asetet, por edhe burimet njerëzore në kopshte. Duam që siç stafi ynë shërben me të njëjtën cilësi dhe pasion, po ashtu edhe ndërtesat të dhurojnë të njëjtat kushte cilësore për fëmijët, sepse qytetarët e Tiranës na kanë besuar gjënë e tyre më të shtrenjtë”, ka thënë Veliaj.
