“Rishikimi” i çmimeve të energjisë elektrike në qershor
Ka shumë të ngjarë që duke filluar nga qershori çmimi i energjisë të jetë më i lartë se aktualisht. Enti Rregullator i Energjisë ka njoftuar se do të ketë rishikim të çmimeve të energjisë për konsumatorët fundorë. Ndërhyrja në qershor, ku nuk përjashtohet as mundësia e rritjes së cmimit është e kushtëzuar edhe për shkak se viti tjetër është një vit zgjedhor. Por ERE nuk ka dhënë specifikime të mëtejshme, duke i lënë të hapura të gjithë alternativat që nga rritja e cmimit për familjarët e deri tek goditja që mund tu jepet klientëve të tjerë si biznese apo subjeltet jobuxhetore. Fakti që ndërhyrja bëhet në mes të vitit nuk i përjashton nga lista as familjarët, ndonëse rritja e çmimit për ta do të ishte një kosto e madhe politike për qeverinë. Aktualisht konsumatorët familjarë e blejnë 1 kilovatorë energji me 9.52 lekë. Rishikimi në rritje i cmimit të energjisë elektrike është edhe një kusht nga donatorët të cilët kanë dhënë hua dhe kredi për sistemin elektroenergjetik. Megjithatë procesi është vetëm në fillim pasi ERE ka deklaruar se KESH, OST dhe OSHEE nuk kanë paraqitur aplikime për rishikimin e tarifave përkatëse për vitin 2016.
