Shpallja luftë organizatës FETO (gylenistët) ishte një ndër mesazhet që Presidenti turk Rexhep Erdogan dha nga kryeministria në Tiranë, në deklaratën e përbashkët për mediat krah kryeministrit Edi Rama.
“Diskutuan dhe çështjen e luftës ndaj organizatave terroriste, veçanërisht FETO. Shpresojmë ta vazhdojmë luftën tonë në mënyrë efektive përmes vendimeve që kemi marrë sot”, tha Erdogan.
Presidenti turk foli edhe për Xhaminë e Namzgjasë, e financuar nga qeveria turke, në inaugurimin e së cilës pritet të marrë pjesë më vonë gjatë ditës.
“Xhamia e Namazgjasë është dhuratë e popullit turk për vëllezërit dhe motrat në Shqipëri”, tha ai.
Erdogan u shpreh se në takimin me Ramën u diskutua edhe për bashkëpunimin në trageti apo në fushën e Shëndetësisë me spitalin e Fierit. Ai shtoi se Turqia do të ofrojë mbështetje për nevojat e forcave të armatosura me Shqipërinë në fushën e pajisjeve dhe trajnimeve ushtarake.
Erdogan përmendi edhe luftën në Lindjen e Mesme, duke theksuar se Iraeli po bën gjenocid në Gaza. “Mizoritë izraelite në gaza ishin ndër pikat e agjendës sonë. Agresionet e qeverisë netanjau janë kërcënim global. Gjenocidi në gazë është turp i përbahskët i gjithë njerëzimit”, tha ai.
Para deklaratës, mes ministrave të dy vendeve, Shqipërisë dhe Turqisë, u firmosën 3 marrëveshje bashkëpunimi. Një ndër marrëveshjet e nënshkruara është deklarata e synimit mbi bashkëpunimin në fushën e sigurimeve në bujqësi. Marrëveshja tjetër e firmosur është protokolli për Hapjen e Degës, Njësisë Akademike, Programeve të Studimit nga Universiteti Teknik i Stambollit në Shqipëri. Po ashtu, mes dy vendeve u nënshkrua memorandumi i mirëkuptimit për bashkëpunim në fushën e marrëdhënieve me publikun dhe komunikimin.
Rama falenderon Erdoganin në turqisht, konfirmon faljen e dronëve dhe hapjen e shkollës turke në Tiranë
Në nisje të deklaratës së përbashkët, kryeministri Rama falënderoi presidentin Erdogan për vizitën në Tiranë, ku përveç përurimit të xhamisë së Namazgjasë u nënshkruan disa marrëveshje mes Shqipërisë dhe Turqisë. “Ejvallah”, i tha Rama presidentit Erdogan në deklaratën e përbashkët për mediat.
“Presidenti i Turqisë e përsërit sa herë takohemi dhe me shumë të drejtë, që niveli i shkëmbimeve tregtare mes Turqisë dhe Shqipërisë nuk e pasqyron ashtu siç duhet potencialin mes dy vendeve dhe ambicia jonë është që sa më shpejt të arrijmë tavanin e 2 miliardë eurove, për të çelur një fazë të dytë me edhe më shumë të zhvillimeve të këtyre shkëmbimeve”.
Rama tha se edhe Erdogan kishte rënë dakord që Turqia duhet të bëjë më shumë investime në vendin tonë në fushën e turizmit. “E dimë të gjithë që Turqia ka bërë një transformim të jashtëzakonshëm në këtë fushë dhe ka një nivel ekslence që është e domosdoshme për ne”, tha Rama.
Rama falënderoi presidentin Erdogan edhe për “dronët kamikazë” që tha se Turqia ia ka dhuruar Shqipërisë.
“Dhurata nuk duhet të shqetësojë askënd se kë do të godasë Shqipëria, por është një dhuratë që përmban brenda një mesazh shumë të qartë të Turqisë në raport me këtë marrëdhënie, që Shqipëria është e pagoditshme”, tha Rama.
Kredite i dha edhe për ndërtimin e Xhamisë së Namazgjasë. “Ishit zëri i komuniteti besimtar mysliman shqiptar, para uniteti mysliman turk duke garantuar mbledhjen e mjeteve për ndërtimin e xhamisë së madhe, por keni qenë edhe në çdo rast kur jemi takuar shumë i vëmendshëm dhe këmbëngulës për të parë këtë ditë sot dhe jam i bindur që ju në Turqi keni xhami shumë të bukura, por ajo xhami që do të shihni sot do të hyj në koleksionin e xhamive më të bukura të ndërtuara në kohët moderne. Kjo është merita juaj, sepse jemi takuar për herë të parë dhe në fund të takimit kur erdha kryeministër i sapozgjedhur në Shqipëri, erdhi projekti dhe thatë ky është projekti vëllazërisë shqiptaro-turke”.
Ai konfirmoi edhe nisëm e qeverisë turke për hapjen e një universiteti në Tiranë.
“Sot firmosëm disa marrëveshje. Më e mirëpritura është firmosja e marrëveshjes për Universitetin Teknik të Stambollit në Tiranë”, tha.
Ai foli edhe për konfliktin në Gaza, ku më herët Erdogan tha se Izraeli po bën gjenocid.
“Ajo që ndodh çdo ditë në Gaza është një tragjedi kolosale. Ne bashkë ndajmë me Presidentin Erdogan vlerësime të njëjta lidhur me agresionin rus në Ukrainë dhe lidhur me të drejtën e pamohueshme të popullit palestinez për të jetuar i lirë në shtetin e tij, por Hamasi dhe çdo burim tjetër i terrorit nuk ka vend në të ardhmen paqësore e që duhet të vendoset mbi dy shtete sovrane, Izraeli dhe Palestina, të cilat duhet të jetojnë të sigurta dhe askush nuk duhet të vërë në pikëpyetje të drejtën e ekzistencës së tyre”, u shpreh.
Rama nuk bëri asnjë koment lidhur me deklaratat e Erdogan për luftën ndaj FETO-s.
