Stuhia e erës së fortë ka lënë pa energji 9 fshatra në dy qendra administrative përkatësisht atë të Kukurit dhe Kodoviat prej 24 orësh në Gramsh.
Ndërkohë banorët kanë shprehur shqetësimin e tyre me pretendimin se sa herë prishen kushtet atmosferike, ndërpritet edhe furnizimi me energji elektrike.
CEZ nga ana tjetër njofton se punonjësit janë në terren për të bërë të mundur riparimin e defekteve që janë krijuar.
Banorët ankohen se stinën e dimrit energjia pothuajse mungon gjatë gjithë kohës dhe shkak sipas tyre është rrjeti i amortizuar i shpërndarjes.
Mungesa e rrymës i vendos banorët përballë një sfide të madhe sa i përket ngrohjes apo përdorimit të pajisjeve elektro-shtëpiake.
