Kryeministri Edi Rama gjatë një takimi me të rinjtë në Kamëz, është përballur me pyetjet e këtyre të fundit, për largimin masiv të shqiptarëve drejt Britanisë apo vendeve të tjera në Evropë. Ky fenomen nuk e shqetëson Ramën, i cili deklaroi se nuk do t’i ndalojë të rinjtë të largohen duke thënë se nuk do “iu mbyllte derën dhe ti mbante këtu”.
Në fjalën e tij, Rama tha se jo vetëm në Shqipëri, por në të gjithë botën ka lëvizje të qytetarëve nga një shtet në tjetrin, por kryeministri “harroi” të shtonte që vendi ynë po shënon shifra rekord emigrimi duke ia kaluar dhe Ukrainës që është në luftë.
Lexo edhe: Zgjedhjet vendore, Rama rikonfirmon një tjetër kryebashkiak
“Ka shumë rëndësi fjala dhe citimi korrekt. Largimi i të rinjve nuk është sot një trend në të gjithë Europën, ky është një trend historik që të gjithë e kanë kaluar. Është shumë e thjeshtë por dhe shumë sipërfaqësore që largimet gjatë këtyre 30 vjetëve po vijnë si rezultat i politikës së degjeneruar.
Asnjë lloj politike, apo skuadre politike, dhe ju e dini shumë mirë që unë nuk kam respekt për ata që ishin para nesh, por asnjë skuadre politike nuk do të kishte mundur dot dhe të mbyllte derën dhe që shqiptarët t’i mbante këtu.
Këtu në një periudhë kohe të shkurtër dhe për historinë 20-30 nuk janë një periudhë e gjatë që të bëhej si Gjermania, Britania, Zvicra, kjo nuk është e mundur, se po të ishte e mundur do të kishte ndodhur diku tjetër.
Nëse këtu do ta kishin fajet politikanë e poshtër, me siguri në vendet e tjera do të kishin dalë udhëheqës që do ta kishin frenuar këtë lloj trendi, por kjo nuk ka ndodhur. Ne flasim sot për të rinj që ikin nga fshati. Më tregoni një vend sot në BE, kur të rinjtë nuk ikin nga fshati.
Kjo është gjëja më normale, sigurisht diku më shumë, diku më pak patjetër. Më tregoni një vend pas vitit 90-të që nuk ka pasur largime masive.
Mos harrojmë që vendet e tjera nuk dolën nga izolimi total si ne, me të vërtetë vendet ish-komuniste nuk e kishin rrugën e hapur për të shkuar në perëndim, por e kishin rrugën e hapur mes vetit, kështu që largimet i kanë bërë me kohë e me vakt, ndërkohë që ne u mbyllëm për 50 vjet brenda, na u hodh çelësi në det, mbasi kishim qenë më parë një popull mbas migrimit”, tha Rama.
