Zgjidhja e krizës mund të vijë vetëm nëpërmjet bashkëpunimit me Turqinë
“Të sigurojmë kufijtë e Shqipërisë dhe Maqedonisë me Greqinë”, Deklarata i takon Kancelares së Gjermanisë, Angela Merkel, gjatë konferencës të përbashkët me Sekretarin e Përgjithshëm të OKB-së, Ban ki-Moon. Për të dhënë një zgjidhje për situatën e vështirë të krijuar nga fluksi i emigrantëve Merkel ka theksuar se është shumë i nevojshëm bashkëpunimi midis shteteve europiane e Turqisë. Vetëm kështu sipas Kancelares edhe Greqia që po kalon një situatë të vështirë do ta ketë më të lehtë menaxhimin e flukseve në rritje. “Kemi vërtet nevojë që të sigurojmë kufijtë e Shqipërsë dhe Maqedonisë me ata të Greqisë. Duhet gjithashtu që të mundësojmë strehim për të gjithë azil-kërkuesit. Zgjidhja e krizës mund të vijë vetëm nëpërmjet bashkëpunimit me Turqinë. Kooperimi mund të rivendosë stabilitet në Greqi.”
Aktualisht në territorin helen ndodhen afro 33.000 refugjatë, të cilët pritet të kthehen mbrapsht në Turqi në rast se marrëveshja e arritur paraprakisht me qeverinë e Ankarasë do të miratohet plotësisht në samitin e radhës që do të mbahet përgjatë datave 17 dhe 18 mars.
Fluksi i lartë i azil-kërkuesve ka krijuar një situatë mjaft të vështirë në Greqi, e sidomos në kufirin e saj me Maqedoninë, ku prej javësh mijëra emigrantë kanë mbetur të bllokuar.
