Emergjencat Civile njofton se reshjet e shiut janë pakësuar dhe vendin e tyre e kanë zënë bora në zonat malore. Në përgjithësi moti në vendin tonë ka ardhur drejt përmirësimit.
Rreziku kryesor nga lumi Vjosë në Vlorë dhe Fier është në ulje, nga zvogëlimi i prurjeve dhe tërheqja e ujërave.
Aktualisht deri tani janë evakuuar 596 familje dhe janë shpëtuar 1,552 qytetarë. Gjenden të përmbytura 10,217 ha tokë, kryesisht në Fier dhe Vlorë, si dhe 5,781 ha me prani uji. Banesa të përshkuara nga uji dhe të përmbytura janë 3,337 në mbarë vendin.
Shkatërrimi i urave është një ndër fenomenet e veçanta të emergjencës aktuale, që në ndryshim në ato të mëparshmet, lidhet me furinë e jashtëzakonshme të prurjeve të ujit, të shkaktuar nga intensiteti i jashtëzakonshëm i reshjeve.
Krahas menaxhimit të emergjencës, ka filluar edhe inventarizimi i dëmeve të shkaktuara. Vlerësohet maksimalisht gatishmëria e ofruar nga fqinjët, organizatat ndërkombëtare dhe partnerët tanë për përballimin e gjendjes dhe riparimin e dëmeve.
