E mbylli sezonin në mënyrën më të mirë të mundëshme, me një gol spektakolar ndaj Vllaznisë, madje gjatë sezonit dëshmoi së është një nga futbollistët më të talentuar që luajnë në Shqipëri. Por duket se Elis Bakaj e ka mbyllur me Tiranën, por edhe me kampionatin tonë dhe është pothuajse e sigurtë që edicionin e ardhshëm do ta shohim me një fanelë të huaj. Ende nuk bëhet i ditur emri konkret i skuadrës, por kontrata me Tiranën që ishte 1-vjeçare, me opsion rinovimi edhe një vit, nuk do të vazhdojë. Ish-lojtari i Partizanit në kampionatin tonë, i Dinamos së Tiranës dhe asaj të Bukureshtit, pati një sezon shumë të mirë edhe në Ukrainë, tek Çernomorets Odesa, që u ndërpre me ndërhyrjen ushtarake ruse. Por Bakaj nuk është problemi i vetëm i drejtuesve bardheblu. Së fundi është folur edhe për largime të tjera të rëndësishme, duke filluar nga mbrojtësi serb Karan dhe së fundi edhe Muça, i dënuar 12 muaj nga Komisioni i Disiplinës. Nuk dihet ende e ardhmja e mesfushorit japonez Fukui, ndërkohë që të gjithë sulmuesit janë larguar përpara përfundimit të edicionit dhe Bakajt i është dashur të bëj edhe goleadorin (13 herë ka shënuar vetëm në kampionat), megjithëse pozicioni ideal i tij është pas sulmuesve. Kështu që për të ndërtuar Tiranën e re, e cila sërish nuk do të jetë pjesë e Europës do të duhet një tjetër mega-investim nga presidenti Halili, nëse një gjë e tillë do të jetë e mundur.
