Tronditet sërish qyteti i Shkodrës nga një vrasje e dyfishtë. Viktimat janë Astrit dhe Ibrahim Bilali, dy vëllezër që u vranë sapo dolën nga banesat e tyre. Astrit Bilali është babai i boksierit të arrestuar si pjesë e grupit Bajri, Asmer Bilali. Asmer Bilali doli në media i përfshirë në këtë ngjarje, pasi pas vrasjes mbi kalë të biznesmenit Arjan Ferracaku, ai u dyshua se ishte objektivi.
Kush janë dy viktimat?
Burime për Dosja.al bëjnë me dije se Astrit dhe Ibrahim Bilali nuk kanë patur precedent të mëparshëm penalë. Ibrahim Bilali është një iniciatorët e 2 prillit në Shkodër ku ngeli i vrarë edhe Arben Broci. Astrit Bilali është pronari i resortit të kuajve ku shumë anëtarë të grupit Bajri kanë qenë frekuentues të rregullt.
Asmer Bilali, djali i Astritit ishte prezent në momentin kur u ekzekutua Arjan Ferracaku, me breshëri plumbash, një ngjarje ende e pazbardhur. Ngjarja e sotme dyshohet se lidhet me një zinxhir të ngjarjeve kriminale që ndodhin në këtë qytet. Pista e parë ku po dyshon policia është ajo e hakmarrjes. Ditën e djeshme, u lirua nga Gjykata e Apelit në Tiranë një nga anëtarët e grupit Bajri, Emrah Plaku.
