Mjeku i njohur Erion Dasho ka shprehur shqetësimin e tij në lidhje me pacientët e shtruar në spitalet COVID, pasi në këto spitale ka më shumë persona të dyshuar si të infektuar se sa pacientë të diagnostikuar me virus.
Sipas mjekut, nuk dihet nëse personat e dyshuar pas shërimit dhe daljes nga spitali e kanë kaluar apo jo COVID-in, që ka shumë rëndësi për strategjitë parandaluese në të ardhmen.
Ai flet edhe për shqetësimin e ekspertëve që kanë fajësuar Ministrinë për cilësinë e testeve, pasi këto teste nuk mund të identifikojnë personat e prekur nga COVID-19, duke nxjerrë më shumë rezultate fals negativë.
Dasho shpreh shqetësimin edhe për faktin se pse nuk po përdoret testi i antitrupave, i cili mund të identifikojë antitrupa duke nisur nga fundi i javës së parë të sëmundjes, ndërsa thekson se është koha që të mendohet seriozisht për diagnozën e saktë dhe të besueshme të pacientëve të riprekur ose të dyshuar me COVID-19.
Postimi i plotë:
Është shqetësues fakti se në dy spitalet ku trajtohen pacientë të prekur nga COVID, ka më shumë pacientë “të dyshuar” me COVID se sa pacientë të diagnostikuar.
Një nga maksimat e para që na kanë mësuar profesorët në fakultet ka qënë se “pa diagnozë, nuk ka mjekim”. Kuptohet se paqartësia në vendosjen e diagnozës së COVID, e cënon procesin e përkujdesjes për shëndetin dhe jetën e pacientëve.
Përveç implikimeve për shëndetin e pacientëve, situata ka implikime edhe për shëndetin publik si në nivel individi, ashtu edhe në nivel popullate.
Në nivel individi, nuk dihet në se, pas shërimit, këta persona e kanë kaluar apo jo COVID-in gjë që ka rëndësi për strategjitë parandaluese në të ardhmen.
Në nivel komuniteti apo popullate, njohja e statusit lidhur me COVID tek këta pacientë ka rëndësi për të vlerësuar përhapjen e COVID në popullatë dhe orientuar gjurmimin.
Shumë ekspertë jashtë qeverisë kanë fajësuar Ministrinë për cilësinë e dobët të testeve. Ata kanë argumentuar se testet me besueshmëri të ulët kanë sjellë në pikën kur testimi nxjerr më tepër fals negativë (persona të prekur nga COVID që testi nuk i identifikon dot) se sa realisht pozitivë (persona të prekur që testi i identifikon si të tillë).
Ditët e fundit kanë qarkulluar edhe idetë se pacientët janë paraqitur me shumë vonesë pranë spitaleve COVID, kur virusi ka “migruar” tashmë nga fyti (aty ku e identifikon testi i tamponit) drejt mushkërive.
Në të dy rastet është e pakuptueshme se përse nuk përdoret testi i antitrupave i cili ka shumë gjasa të identifikojë antitrupa IgM duke nisur nga fundi i javës së parë të sëmundjes, atëherë kur edhe mendohet se mund të jetë negativizuar tamponi.
ËSHTË KOHA QË TË MENDOHET SERIOZISHT PËR DIAGNOZËN E SAKTË DHE TË BESUESHME TË PACIENTËVE TË PREKUR OSE TË DYSHUAR SI TË PREKUR ME COVID.
KJO JO VETËM NË DOBI TË TYRE, POR EDHE NË DOBI TË KOMUNITETIT DHE GJITHË POPULLSISË!
