Kombet e Bashkuara rekomandojnë zbardhjen e shkeljes së të drejtave të njeriut në periudhën e komunizmit. Delegacioni i Grupit të Punës për Zhdukjet e Detyruara, i organizatës deklaroi në përfundim të vizitës së parë të këtij lloji në Shqipëri, se do të raportojë në Këshillin për të Drejtat e Njeriut në shtator të 2017-s mbi faktet e konstatuara. “Vlerësohet se ka rreth 6000 viktima të zhdukura gjatë regjimit komunist në Shqipëri. Çfarë është dhe më shumë shqetësuese është informacioni që iu dha Grupit të Punës se shumica e kërkimeve për eshtrat dhe gërmimet në vendvarrimet e dyshuara të ndodhura në Shqipëri janë kryer nga familjarët e të zhdukurve, me burimet e veta financiare, dhe pa mbështetjen e ekspertëve apo të mjekësisë ligjore nga institucionet shtetërore.” Në këtë kontekst, autoritetet e Kombeve të Bashkuara apeluan që të veprohet për identifikimin e të zhdukurve me forcë sipas marrëveshjes së parashikuar me Komisionin Ndërkombëtar për Personat e Zhdukur. “Projekti do të përfshijë mbështetje për sistemet e menaxhimit të të dhënave, mbledhjen e kampioneve, si dhe bërjen e testeve të ADN-së dhe të përputhshmërisë së tyre. Grupi i Punës i bën thirrje Qeverisë së Shqipërisë të përfundojë sa më shpejt të jetë e mundur përgatitjet e nevojshme për fillimin e kësaj nisme, pasi shqyrtimi i plotë i të gjitha vendeve të identifikuara të varrimit nuk mund të shtyhet më gjatë.”
/rtsh.al/
