Ministria e Mbrojtjes ngre grup pune për hetimin e shkaqeve të këtij aksidenti ajror ku humbën jetën dy pilotë të FA-së
Ekspertë franzezë e amerikanë do të ndihmojnë në hetimet për rrëzimin e helikopterit të ushtrisë në liqenin e Shkodrës. Ministerja e Mbrojtjes Mimi kodheli, ka urdhëruar hetim administrativ të rrëzimit të helikopterit në liqenin e Shkodrës, ku humbën jetën dy pilotë të Forcave Ajrore dhe u plagos një tjetër. Përmes një deklarate për mediat ministria e Mbrojtjes garanton se të gjitha informacionet që do të dalin nga ky hetim administrativ do t’i vihen hap pas hapi në dispozicion prokurorisë.
“Për të ndihmuar procesin e investigimit, Ministria e Mbrojtjes ka thirrur ekspertë të kompanisë prodhuese të helikopterit EC 145, të cilët kanë mbërritur dje në Shqipëri. Po dje, pranë Ministrisë së Mbrojtjes dhe FA-ve kanë mbërritur edhe ekspertë ushtarakë amerikanë me ekspertizë të specializuar të këtij lloj helikopteri.
Policia e Shtetit në bashkëpunim me Policinë Ushtarake ka marrë në ruajtje vendngjarjen me qëllim mos dëmtimin e provave” informon ministria e Mbrojtjes në një deklaratë për median. Me urdhër të Shefit të Shtabit gjeneralmajor Jeronim Bazo është ngritur një grup pune, i cili është vënë në dispozicion të prokurorisë me qëllim kordinimin e të gjithë veprimeve në zonën e ngjarjes, si dhe vënien në dispozicion të të gjithë dokumentacionit dhe provave materiale që do ndihmojnë në hetimin penal.
