“Deklarimet e Dhomës Gjermane nuk përkojnë me realitetin, jemi më mirë se rajoni’
Ministri i ri i financave, Arben Ahmetaj, në një takim me deputetë të Komisionit Parlamentar të Ekonomisë dhe mediat, përcolli një situatë optimiste dhe ka deklaruar se ekonomia reale është më mirë sesa perceptimi për të. Për anketimin e publikuar nga Dhoma Gjermane e Tregtisë (DIHA) që e vendoste Shqipërinë të fundit në Europën Juglindore për investimet e huaja, Ahmetaj ka thënë se është një perceptim që nuk përkon me realitetin. Madje kreu i financave ka shkuar edhe më tej në kundërshtimin e lajmeve për ikjen e investitorëve. Sipas tij “kemi 43 mijë kompani të huaja në 3 vitet e fundit në Shqipëri, nuk është e vërtetë se investitorët po ikin”. Një shpjegim të zgjeruar ministri i financave ka bërë edhe për shifrat e rritjes ekonomike. Sipas tij
rritja e vitit 2016 pritet të jetë tre herë më e lartë sesa në 2013-n. Po sipas tij rritja ekonomike në vitin 2015 ishte më e lartë sesa mesatarja e rajonit. Ndërsa të dhënat e INSTAT treguan pak ditë më parë se rritja e konsumit është kthyer në negative për herë të parë që nga viti 1998, Ahmetaj tha se konsumi ka rënë shumë pak në krahasim me vendet e tjera të rajonit.
Po ashtu duke vijuar raportimin e tij në Komisionin e Ekonomisë, kreu i Financave shqiptare tha se kredia konsumatore është rritur. Në prezantimin e tij ministri Ahmetaj ka folur edhe për vetëkorrigjim të ekonomisë, riskun politikm të reformave të ndërmarra nga qeveria, fazën e dytë të aksionit antiinformalitet, borxhin publik dhe projektet e mëdha private në ekonomi.
