Katër të rinjtë i kishin vënë 29 mijë euro gjobë një personi
Operacioni policor “Eklipsi” është finalizuar me shkatërrimin e një bande që vinte gjoba në kryeqytet. Dy të rinj kanë rënë në pranga, ndërsa dy të tjerë janë shpallur në kërkim për veprën penale të “Shtrëngimit me anë të kanosjes për dhënie pasurie”. R. A 18 vjeç dhe Luan Lama 19 vjeç, të dy banues në Tiranë janë arrestuar, ndërsa janë shpallur në kërkim F. Gj 29 vjeç dhe I. Sh 19 vjeç. Policia njoftoi se “këta shtetas prej një periudhe 5 mujore dyshohen se i kanë marrë të dëmtuarit E. B. me anë të dhunës dhe kanosjes një shumë prej 26.000 euro dhe po tentonin qe ti merrnin dhe një shumë tjetër prej 3000 euro”. Në momentin që këta shtetas po tentonin të merrnin shumën e parave është bërë kapja në flagrancë e tyre në rrugën e “Barrikadave”, në afërsi me shkollën e mesme të përgjithshme “Sami Frashëri”.
