21 janar 2017/ 6 vjet nga vrasjet në Bulevard. Fjalimi i përvitshëm i kryeministrit në takim me familjarët e viktimave.
Një grua me shami të bardhë, e ëma e njërit prej katër protestueve të vrarë më 21 janar 2011, ishte sot në grupin e njerëzve që dëgjuan për gati një orë, kryeministrin Rama në fjalimin e tij të përvitshëm për 21 janarin.
Ishte njësoj fjalimi i tij, si një, dy, tre, katër apo pesë vite më parë. Të njëjtat fjalë, të njëjtat premtime, të njëjtat jusfikime dhe e njëjta propagandë me reformat që ka bërë, tre vite e gjysëm në qeverinë që po drejton.
E nisi me reformën në drejtësi dhe drejtësinë si fajtore për autorët e pandëshkuar të vrasjes së 21 janarit. E vazhdoi me reformat e guximshme të qeverisë,… vijimësia e propagandës… nga shëndetësia falas, reforma ekonomike e pensioneve e kështu me radhë… dhe përfundoi me akuzat për kazanin e medias që paskësh pasë njollosur vendimin e tij për të dëmshpëblyer me 400 mijë dollarë viktimat e 21 janarit.
Ajo grua me shami të bardhë e të tjerë familjarë që ishin aty të katër viktimave, nuk duan të dinë shumë se cili është suksesi i qeverisë që po drejton Rama. Natyrshëm, ata duan të dinë çastin, kur do të vendoset drejtësia për vrasjen e njerëzve të tyre të dashur. E fundit që ata do të donin të dëgjonin është propaganda e kryeministrit me reformat e tij, madje do të duhej të ishte i fundit edhe sqarimi që i bëri vendimit për të dëmshpëblyer gjakun e katër viktimave e aq më pak komentet e se “mediat e kazanit” ia paskan njollosur bujarinë e tij.
Ajo grua me shami të bardhë, e ka humbur djalin e saj më 21 janar 2011. Nuk ia zëvëndësojnë të birin as reforma në drejtësi, as reformat e mëdha e as 400 mijë dollarë që i dhanë me vendim qeverie. Parimisht, kështu duhet të ishte. Është shumë e thjeshtë, ajo grua me shami të bardhë e kishte dërguar djalin e saj atë ditë në besën e Ramës. U braktis bashkë me të tjerët, mu në mes të bulevardit, atje ku siç thatë vetë kryesocialisti, do ta vriste “dora e pushtetit të votave të vjedhura për të vjedhur Shqipërinë”.
Aleksi, Hekurani, Ziveri dhe Faiku, ishin bashkë me mijëra të tjerë në atë protestë për të kundërshtuar vjedhjen e Shipërisë, ashtu siç u pa ato ditë në videoskandalin e vjedhjes së 700 mijë eurove: “me zë e figurë faqe gjithë Shqipërisë”, siç u shpreh Edi Rama asokohe. Fati i tyre i zi ishte shkruar të linin shpirtin në atë protestë dhe Rama u betua mbi gjakun e tyre se do të bënte drejtësi për ta. U betua atë ditë e për dy vite rresht që zbardhja e 21 janarit do të vinte sapo të fitonte zgjedhjet. U betua se do të vinte në pushtet e kurrë nuk do të bënte aleancë me Ilir Metën, njeriun që u bë shkak për atë ngjarje me viktima. Por, kur erdhi në pushtet harroi. Ndoshta e kishte harresë të detyruar, sepse në pushtet i ngjit me ndihmën e Ilir Metës. Çfarë do që të thotë, të justifikohet e të propagandojë, ky është fakt.
Rama tha ndër të tjera në fjalën e tij se është në drejtimin e duhur për zbardhjen e 21 janarit. Kjo është e vështirë të besohet që Rama është në anën e duhur për çështjen e 21 janarit. Gruaja me shami të bardhë, ndoshta i ka kuptuar shumë nga ato që i thatë për reformat e mëdha. Por, s’ka si ta kuptojë aleancën e oratorit me ata që ishin në krahun e ekzekutorëve të 21 janarit.
