Koalicioni PS-LSI ka rënë, sepse nuk ka më bashkëqeverisje. Kryeministri Edi Rama nuk e ka nën kontroll kabinetin qeveritar. Prej disa muajsh drejtues të lartë të LSI-së, ndër ta edhe ministra, janë duke akuzuar hapur ministrat e tjerë kryesorë të qeverisë Rama, si të ishin në kabinetet e dy vendeve fqinje e jo në të njëjtë skuadër qeveritare. Beteja ndërmjet ministrave të dy partive në koalicion është intensifikuar ditët e fundit. Dy ministra të LSI-së në qeverinë Rama, kanë artikuluar akuza shumë të forta ndaj kolegëve të tyre socialistë në këtë qeveri, kryesisht ndaj ministrit të brendshëm Saimir Tahiri. Ata e akuzojnë se ka drejtuar Policinë e Shtetit në një proces kanabizimi të Shqipërissë, pra shkurt dhe troç, ata e akuzojnë Saimir Tahirin si “baronin” e drogës së mbjellë në Shqipëri në këto dy vitet e fundit. Kanabisi nëpër arat e Shqipërisë është fakt. Pavarësisht akuzave, ne nuk e dimë zyrtarisht se cili është roli i policisë së shtetit në këtë proces kanabizimi. Por, dimë me siguri akuzat e ministrave të LSI-së, Ylli Manjani e Lefter Koka për kanabizimin e Shqipërisë duke bërë përgjegjës Policinë e Shtetit dhe Ministrinë e Brendshme.
Këta dy ministra nuk mjaftohen me kaq e së bashku me ta edhe drejtues të tjerë të LSI-së. Veç drogës, së fundmi janë shtuar konçesionet korruptive, ku shigjetat e helmëta po i drejtohen Ilir Beqajt. Korrupsioni, i cili sipas LSI-së ka përfshirë të gjitha institucionet edhe kryebashkiakët socialistë është një fëmijë bastard që partneri qeverisës i këtyre katër vjetëve dëshiron ta lërë në prehërin e PS-së. Ata i akuzojnë ministrat e PS-së, edhe për rrezikun që po i afrohet me shpejtësi; manipulimi i zgjedhjeve të 18 qershorit. Akuzat e LSI-së përfshijnë krejtësisht qeverisjen. Ajo që duket paradoks është fakti se janë katër ministra të LSI-së në qeverinë Rama, me dhjetra zëvëndësministra e qindra drejtorë e zyrtarë të tjerë të lartë të kësaj partie, të cilët janë duke drejtuar qeverisjen e koalicionit PS-LSI. Është ironi e madhe të pranojmë që njerëzit e LSI-së janë të pakorruptuar dhe e keqja qëndron veç në anën e PS. Nuk ka asnjë mundësi që Ilir Meta dhe këta zyrtarë të lartë të qeverisje, nga ministra e deri tek drejtorët më të thjeshtë, të ndahen nga “kanabizimi”, “korrupsioni”, “konçesionet” “kriminalizimi i institucioneve” dhe “vjedhja e votave”. Ata kanë padiskutim të njëjtën përgjegjësi me Ramën e ministrat e tij. Ata janë po kaq fajtorë për qeverisjen që i dhuruan shqiptarëve në këto katër vjet kanabizimin, korrupsionin, konçesionet abuzive, kriminalizimin e institucioneve, varfërinë mjerimin që ka pllakosur, madje edhe përmes vjedhjes së votave.
Përsa kohë LSI ka qëndruar e vazhdon të qëndrojë në koalicion, kjo e bën përgjegjës atë njësoj si Ramën e ministrat e tij. Edhe sot po të largohen nga koalicioni LSI nuk do t’i shmanget kësaj përgjegjësie, sepse tashmë është bërë “pis” dhe nuk ka asnjë moral të kërkojë votën e shqiptarëve për të qeverisur edhe katër vite përmes: “kanabizimit, korrupsionit, konçesioneve, kriminalizimit të institucioneve dhe vjedhjes së votive”. Asnjëri prej ministrave të PS-së, as të LSI-së nuk mund të dalë sot e të na thotë fajin e ka ai apo ajo, meqënëse nuk iu hyn më në punë shprehja “Fajin e ka Saliu!”.
Situata politike po duket e ngjashme me atë të katër viteve më pare, kur LSI po bëhej gati për t’u larguar nga koalicioni me PD-në, duke i lënë Berishës faturën e dështimeve në qeverisje. LSI mbush tetë dhe jo katër vjet në pushtet, ndaj nuk mund të dalë pak muaj para zgjedhjeve e të akuzojë bashkëpunëtorët e radhës për dështimet në qeverisje. Nuk mundet që shqiptarët të votojnë një formacion politik, ku bën pjesë LSI për të na dhuruar edhe për katër vjet të tjera një (bashkë) qeverisje si kjo e tanishmja apo ajo e katër viteve të shkuara.
