Nga Arben Llalla
Dështoi t’i përçajë me Arlind Qorrin apo Jani Markën. Dështoi me makinën e freshistëve të Endri Fugës, ndaj u ul të përdorë karizmën personale. I ftoi të rinjtë protestues në facebook. Ata në shesh, ky në facebook. Ata i thonë se nuk ka negociata, ky i kërcënon se po e bëni si çadra e opozitës, por e patë si mbaroi ajo punë. Ata i thonë që nuk bëjnë dot mësim, pasi presin gozhdë nga ai ftohti, ai u thotë nuk e ndryshoj ligjin, se ashtu është një muhabet me privatin. Ata i thonë që do dalim me mijëra dhe e rrëzojmë ministrinë, ai u thotë rrini atje, se nuk jeni europianë.
Me një fjalë, tha gjithçka nuk duhet të thoshte dhe po merr mbrapsht gjithçka që nuk donte të merrte.
Djemtë dhe vajzat që deri dje e kishin me merak të mos u përzihej politika, monologu i Ramës i caktoi me detyrim-përcaktim agjendën politike. Vetë kryeministri u la për detyrë që të shembin sistemin, të shembin regjimin.
Ju solli ndër mend çadrën e opozitës dhe i sfidoi, kur kujtoi pazarin që bëri me ministra dhe drejtori. Pra, u dha pazar, por ata janë të rinj dhe veç pazar nuk duan. Ata janë misionarë dhe sak këtu dallojnë me ata që i ulen në tryezë për pazar. Kur të bëjnë rrugëtimin e jetës, kur të mbledhin përvojën, kur të rrihen me vaj e me uthull, pa dyshim që i ul në pazar, por duhet të kenë kaluar vite të mira dhe ata mos të jenë më studentë. Sot, ata duan të ndjehen europianë si shokët e tyre gjetkë që i shohin, i prekin në këtë botë të vogël virtuale. Prandaj, thirrja e tyre: “E duam Shqipërinë si gjithë Europa!” është e qashtër nga perversiteti i pushtetit të Edi Ramës. Madje, ka dhe një lajm shumë të keq për kryeministrin e Rilindjes; ata e besojnë me gjithë mend këtë thirrjen.
Ndaj, kur sulltani u thotë që derisa Shqipëria nuk është vend europian, prandaj nuk ka as studentë europianë, ata e morën komandën.
Ata tani janë bërë misionarë që të hedhin tutje këtë qeveri anti europiane, këtë kryeministër turkoshak që të çojnë përpara ëndërrën e tyre që përmblidhet tek thirrja “E duam Shqipërinë si gjithë Europa!”.
Ja këtë bëri kryeministri, u dha misionin atyre që nuk duhet t’ua jepte. Bëri të njëjtën gjë si Ramiz Alia 28 vjet më parë, ku vetë Rama ishte në anën tjetër të barrikadës. U soll si një udhëheqës i fortë që nuk përfill ca kalamaj që dalin në rrugë, sepse nuk duan të shkojnë në shkollë. Por, ata tani janë një gjindje që janë frymëzuar, jo për të ulur tarifat, por për të rrëzuar qeverinë dhe Edi Ramën vetë, i cili si përherë e ngatërroi kekun me byrekun.
