Nismës qytetare #Edheune kundër votimeve monopartiake të ditës së nesërme, i është bashkuar edhe drejtori i Institutit për Studimin e Krimeve dhe pasojave të Komunizmit, Agron Tufa.
Me një status në Facebook, Tufa bën thirrje për mos votim, ndërsa kërkon që të çmendurin ta lëmë të shkojë në greminë.
Reagimi i plotë:
MOS VOTONI! LËRENI TË ÇMENDURIN DREJT GREMINËS
3 dhjetor 1945 – gjyshërit tanë o nga naiviteti, o nga mungesa e rrugëdaljes dhe dhuna, votuan dhe hynë në diktaturën e terrorit të pandërprerë komunist.
Kjo ishte tragjedia.
30 qershor 2019 – nipër e mbesa, stërnipër e stërmbesa mëdyshen të hyjnë në diktaturën më të ndyrë neokomuniste.
Kur tragjedia përsëritet, si quhet?
Mos e hidhni këtë hap fatal!
Mos i jepni rrokullimën atdheut tuaj në një diktaturë tjetër moniste, skllavëruese e perverse! Mos u bëni mallkimi i të ardhmes suaj e të fëmijëve tuaj!
Kjo do t’ju terrorizojë në këtë e në atë jetë! Mos e ndiqni verbërisht të Çmendurin drejt greminës!
#Edheunë
