Gazetari i The Economist, Tim Judah ka bërë një pasqyrim të situatës së kanabisit në Shqipëri. Ndërsa përshkruan aksionet e policisë për asgjësimin e plantacioneve me kanabis, Judah sjell edhe bashkëbisedimet me banorët të fshatrave të Shqipërisë, që i tregojnë se policia nuk arrin tek të gjitha parcelat me drogë. Gazetari thotë se Shqipëria është furnizuesja më e madhe e Europës me kanabis, ndërsa lë të kuptohet se bosët e drogës janë të paprekshëm dhe vendi ynë krahasohet me ato të Amerikës latine.
Shkrimi i plotë i The Economist
Jemi në pikun e sezonit dhe dhjetëra burra të mbytur në djersë – po punojnë në fushat pranë një fshati shqiptar, Tragjasit, duke korrur boçet e kanabisit. Një grup policësh të armatosur dhe me maska qëndrojnë pranë tyre dhe i mbikqyrin.
Saimir Tahiri, ministri i Brendshëm i Shqipërisë mbërrin me helikopter për të vëzhguar shkatërrimin e plantacioneve. Grumbuj me shkurre, thuajse dy metra të lartë janë në flakë. Tahiri e pranon se tymi i kanabisit shkakton kollë tek policët, por ky është problemi më i vogël sot. “Këtu bëhet lufta e Europës me drogën, -thotë ai- miliarda euro janë në lojë”.
Shqipëria është një furnizuesja e madhe e tregut europian të drogës. Vendi ka qenë prej kohësh baza, nga e cila bandat kriminale kanë kontrabanduar çdo gjë, nga cigaret tek heroina, kokaina, vaji i kanabisit dhe substanca të tjera të ndaluara në pjesën tjetër të Evropës, sipas Qendrës Europiane të Monitorimit për Drogën dhe Varësinë nga Droga, që është dhe agjencia e drogës në Evropë. Çdo ditë e më shumë, Shqipëria po bëhet një prodhues i madh i kanabisit, që shpërndahet nga një rrjet kompleks i krimit të organizuar shqiptar.
Një nga destinacionet më të mëdha është Italia, aty ku “malli” kalon me skafe, kamionë dhe avionë privatë; muajin e fundit trafikantët u përpoqën ta kalojnë edhe me motorrë uji. Një gazetë italiane u hap me një titull disi të çmendur: “Lumenj të drogës” po rrjedhin nga Shqipëria në brigjet e Italisë”. Çdo ditë gjatë kësaj vere, Guardia di Finanza, një forcë paraushtarake e policisë italiane, veproi në territorin shqiptar për të zbuluar koordinatat e plantacioneve të kanabisit për “djemtë” e Tahirit . “Pothuajse të gjithë plantacionet e identifikuara janë shkatërruar”, thotë ai. Në fund të gushtit, ai pretendon se njerëzit e tij shkatërruan një milion bimë kanabisi, nga gjysëm milioni të regjistruara në vitin 2014.
Të tjerë janë më pak të sigurtë për këto shifra. Banorët e këtyre zonave ankohen se disa plantacione – ato të cilat janë të vështira për t’u arritur- nuk janë prekur. Politika shqiptare është e mbushur me akuzat për lidhje të politikanëve me mafian e drogës. Lulzim Basha, kreu i Partisë Demokratike në opozitë, thotë se edhe vetë zoti Tahiri i mbron bosët e drogës. Këtë akuzë, Tahiri e mohon me forcë. Basha gjithashtu pretendon se gjatë fushatës zgjedhore tre vjet më parë, Edi Rama kryeministri socialist i Shqipërisë, bëri marrëveshje të pista me mafiozë të zonave të ndryshem, për të fituar vota; tani, ai mendon se Rama është peng i tyre. Socialistët e hedhin poshtë këtë teori; ata argumentojnë se në tetë vitet kur partia e Bashës ishte në pushtet, kanabisi kultivohej hapur në fshatin e vogël të Lazaratit. Prodhimi ishte i tillë që Ministria e Brendshme e vlerësonte rreth 4.5 miliard euro (6 miliard dollarë), thuajse gjysma e Prodhimit të Përgjithshëm Bruto të Shqipërisë. Shifrat janë për vitin 2014, deri kur në Lazarat hyri policia .
Është e vështirë të rendisësh faktet, kur kanabisi vazhdon të digjet. Plantacionet tani janë përtej Lazaratit. Por zyrtarët italianë refuzojnë të flasin, ndërsa shqiptarët janë seriozë kur bashkëpunojnë me ta. Vitin e kaluar Dritan Zagani, një efektiv në poste drejtuese në polici, kërkoi azil politik në Zvicër, pasi u dyshua se i tregoi italianëve për një rrugë të re të kalimit të drogës; policia shqiptare tha se informacionet rrodhën tek mafia.
Një burim diplomatik thotë se problemi kanabis po shkon “duke u përkeqësuar”. Por, pavarësisht nga shkalla e vërtetë e asgjësimit të kanabisit, është e paqartë nëse kjo ka ndonjë ndikim real. Vende të tjera, si Maroku, gjithashtu furnizojnë Europën me drogë. Në Amerikën Latine, në përgjithësi shkatërrimi i bimëve të koka-s dëmton prodhuesit e vegjël, por i lë të paprekur bosët. Megjithatë, Tahiri është sfidues. “Pavarësisht burimeve të vogla që vumë përballë parave të drogës, thotë ai, njerëzit janë duke punuar më mirë se kurrë këtë vit”. Për qeverinë shqiptare kjo është një çështje e rendit dhe ligjit, dhe e besueshmërisë në Europë, veçanërisht nëse synon të bashkohet me Bashkimin Europian. Tahiri thotë se mafiozët duhet të dinë se nuk ka më “të paprekshëm”./ The Economist
/lapsi.al
