Prokuroria ka depozituar në Gjykatën Penale të Tiranës kërkesën për caktimin e masës së sigurisë “arrest në burg” për dy vëllezërit Sajmir dhe Arsil Shera, të cilët dyshohet se ekzekutuan në datën 3 gusht, 71-vjeçarin Abdulla Budlla.
Seanca po zhvillohet në gjykatë pa praninë e medias, ndërsa në seancë për masë sigurie është edhe Gresian Çela, i cili është arrestuar për posedim të lëndëve narkotike dhe armëmbajtje pa leje. Çela ishte personi që u dha autorëve të krimit automjetin e përdorur në ekzekutimin e 71-vjeçarit, por sipas tij ai nuk e dinte se ajo do të përdorej në një krim.
Kujtojmë se vrasja dyshohet të jetë bërë për shkaqe nderi, pasi nëna e dy djemve ka pasur një lidhje intime me Budllën.
Saimir Shera është shprehur se mes Budllës dhe nënës së tij ka pasur një lidhje dhe prej fjalëve që qarkullonin në fshat ishte detyruar të largohej nga Shqipëria.
“Vrasjen e bëra unë. Vëllai më ndihmoi vetëm me transportin. Nuk mund të duroja më. Gjithë fshati e dinte për lidhjen e nënës sime me Abdullain. Prej vitesh fjalët qarkullonin në fshat. Kam ikur nga Shqipëria prej fjalëve”, ka dëshmuar ai.
Më vonë i riu është kthyer në Shqipëri dhe është zhvendosur në një shtëpi më vete. Sipas dëshmisë, kryerja e vrasjes është bërë momenti kur ka mësuar se Budlla i ka ngacmuar edhe motrën.
Shera është shprehur se kallashnikovin që ka përdorur në krim e ka pasur të fshehur që prej vitit 1997. Pasi ka njoftuar të vëllain që ta merrte me makinë, ka shkuar tek vendqëndrimi i taksive tek Lapidari në Fushë-Prezë dhe e ka qëlluar 71-vjeçarin disa herë. Shera pretendon se më pas është larguar drejt Fushë-Krujës, ndërsa armën e ka hedhur në një kamion me skrap.
“Pak ditë më parë mora vesh që Abdullai kishte ngacmuar dhe motrën dhe nuk durova më. Mora kallashnikovin që e kisha të fshehur që në 1997 njoftova vëllain të vinte me makinë dhe sapo e pashë Abdullain tek vendqëndrimi i taksive tek “Labidari” e qëllova. Pas krimit u largova në Fushë-Krujë. Rrugës pashë një kamion me skrap dhe e hodha armën aty”, ka thënë Saimir Shera.
Abdulla Budlla u vra në Fushë-Prezë më 3 Gusht. Për këtë ngjarje janë vënë në pranga vëllezërit Saimir dhe Arsil Shera. Viktima ishte baba i 4 fëmijëve, 3 djem dhe 1 vajzë.
