Një 27-vjeçar është bërë pjesë e kronikave në mediat greke pas dhunës fizike që ushtroi ndaj bashkëshortes së tij. Por, fatmirësisht një fqinj i tyre ndërhyri në kohë kur kuptoi që po i kanosej jeta, të resë dhe bashkëshortes 24-vjeçare të shqiptarit.
Shqiptari është arrestuar mbrëmjen e së mërkurës në shtëpinë e tij në rrugën Selinou, Greqi.
Arrestimi i tij erdhi pas denoncimit të një fqinji, i cili kuptoi se bashkëshortja 24-vjeçare e autorit po dhunohej fizikisht dhe se i rrezikohej jeta.
Fillimisht fqinji ka pasur guximin të trokasë në derën e çiftit, raporton abcnews.al.
27-vjeçari u përpoq ta largonte, por më pas, pas këmbënguljes së fqinjit filloi ta kërcënonte edhe atë.
Menjëherë është lajmëruar policia, e cila mbërriti në vendin e ngjarjes dhe bëri arrestimin e shqiptarit.
Duke qenë se në kuadër të hetimeve paraprake u konstatua se çifti banonte ilegalisht në Greqi, për 27-vjeçarin do të nisë procedura e dëbimit.
Nga ana e saj, 24-vjeçarja ka të drejtë të kërkojë dhe të marrë leje qëndrimi në vend, por ajo vetë duket se dëshiron të kthehet pranë familjes së saj në Shqipëri.
