Në mbledhjen e sotme të qeverisë, kryeministri i Kosovës Albin Kurti foli për dështimin e negociatave në Bruksel. Ai u shpreh se në ftesën që pranoi për takimin në Bruksel, ishte theksuar se po ftoheshin për të diskutuar “me urgjencë në propozimin e BE-së të përkrahur nga Gjermania e Franca për normalizim të marrëdhënieve” dhe në paragrafin e dytë ishte edhe çështja e targave.
Kurti hodhi sërish akuza në drejtim të Borrellit duke thënë se iu përshtat qëllimit të Serbisë dhe në kundërshtim me parimin e propozuar nga vetë ai filloi të insistojë në një marrëveshje vetëm për pezullimin e shqiptimit të gjobave.
“Të premten që shkoi u ftova në Bruksel për një takim të organizuar në selinë e BE-së në Bruksel të nivelit të lartë me presidentin e Serbisë. Ftesa e përfaqësuesit të lartë Borrell ishte e shoqëruar me një tekst me katër paragrafë që mëtonte të lëshohej si deklaratë. Në paragrafin e parë bëhej ftesë për përqendrim me urgjencë në propozimin e BE-së të përkrahur nga Gjermania e Franca për normalizim të marrëdhënieve.
Në paragrafin e tretë, teksti bënte thirrje të fillonin me njëherë diskutimet për propozimin e BE-së që të fillonin menjëherë diskutimet për një marrëveshje para marsit të vitit 2023. Natyrisht këtë propozim të Borrell e kam mirëpritur dhe tashmë ishim deklaruar që propozimi franko gjerman në të cilin Borrell insistonte që ta quanim propozim të BE-së paraqet një bazë të mirë për diskutim. Në paragrafin e dytë ishte çështja e targave së bashku me garancionet për komunitetin serb.
Gjatë tetë orëve i zhvilluam gjashtë takime, tri bilaterale, e tri trilaterale. Parakushti për targat kishte të bënte vetëm me pezullimin e veprimeve të Qeverisë së Kosovës dhe jo me ndalimin e lëshimit të targave nga ana e Serbisë në versionin inicial. Ne ishim të pajtimit që për t’i dhënë hapësirë bisedimeve për propozimin e BE-së, t’i jepnim hapësirë pezullimit të fazës së dytë të vendimit për targa, mirëpo natyrisht atëherë kur Serbia ndalon së regjistruari makina me targa ilegale. Ky propozim u pranua dhe besoj që ishte një arritje e rëndësishme e takimit. Komuniteti serb në Kosovë është komuniteti më i mbrojtur dhe më i privilegjuar në Kushtetutë të Kosovës dhe kjo është rezultat i marrëveshjes gjithëpërfshirëse të Ahtisarit. Të drejtat për pakica në Kushtetutën e Kosovës nuk i gjen në atë të Serbisë, por as në shumë vende të tjera të botës. Pas takimit në Bruksel, i cili gjithsej zgjati 8 orë, Borrell fatkeqësisht e ndryshoi premisën e diskutimit të ditës së hënë.
Kurti ka thënë se ai ishte i fundit që u largua nga ndërtesa e BE-së, ngaqë bëri edhe një përpjekje të fundit për të arritur një marrëveshje. Kurti tha se në momentet e fundit nga ndërmjetësi evropian në dialog, Miroslav Lajçak mori edhe një propozim të fundit, për një tekst i cili do ta përfshinte edhe propozimin e BE-së, mirëpo Kurti tha se më pastaj i kishte njoftuar se Vuçiçi nuk pranoi.
“Në kundërshtim me parimin e propozuar nga vetë ai filloi të insistojë në një marrëveshje vetëm për pezullimin e vendimit për targa. Qëllimi i madh u hoq nga agjenda, nevoja urgjente për propozimin franko-gjerman u zhduk nga tavolina duke iu përshtatur qëllimit të Serbisë, presidenti i së cilës kishte ardhur aty për targa jo për propozimin e BE-së. Unë nuk jam as polic, as komandat stacioni, as zyrtar dogane që të merrem me gjithfarë çështje teknike që dalin nga bisedimet.
Unë shkoj për marrëveshjen finale ndërkombëtare e ligjërisht të obligueshme për normalizimin e plotë të marrëdhënieve me njohjen në qendër. Ky duhet të jetë qëllimi. Autorët e propozimit të BE-së e braktisën propozimin e tyre, andaj edhe takimi përfundoi.
Sikurse në takimin e 18 gushtit, edhe në këtë takim, unë isha i fundit që e lëshova ndërtesën e BE-së sepse gjithmonë ekziston mundësia edhe për një përpjekje të fundit. Dhe më duhet të ju them se ka qenë edhe përpjekja e fundit. Emisari Lajçak ka ardhur tek ne dhe e bëri edhe një përpjekje të fundit për një tekst i cili do ta përfshinte edhe propozimin e BE-së, mirëpo më pastaj na njoftoi që Vuçiç nuk e ka pranuar, ndërkaq Borrell tashmë ndodhej në konferencë për media”, tha Kurti.
