Një ngjarje e rrallë ka ndodhur në Argjentinë pasi tifozi ka sulmuar me armë zjarri arbitrin e futbollit.
Arbitri Oscar Antonio Perez, 48 vjeç është qëlluar dy herë me pistoletë në ndeshjen e nivelit amator në qytetin Yerba Buena, në provincën Tucuman. Për momentin arbitri është i shtruar në spital për plagë të rënda në pjesën e shpinës.
Ngjarja ka ndodhur në pushimin pas pjesës së parë kur një grup tifozësh po kërkonin llogari në tribunë ndaj arbitrit. Autori i sulmit, një nga tifozët në tribunë, pas ngjarjes së rëndë është arratisur me motor dhe është në kërkim nga policia.
Ndihma e shpejtë i ka shpëtuar jetën arbitrit. Siç është raportuar për gazetën “El Tucumano” nga kreu i komisariatit të San José, Héctor Falcón: “Oscar Antonio Perez është në terapi për të qenë më i kontrolluar. Por ai është ende në rrezik.”
