Ndërsa në vendin tonë janë tashmë 10 raste të konfirmuara me koronavirus, një nga rastet më të rënda është ai i regjistruar në spitalin e Durrësit, ku një 75 vjeçare mund të ketë të ketë infektuar mjekët dhe infermierët.
Mësohet se e moshuara u paraqit në spitalin e Durrësit më datë 3 mars dhe u shtrua në patologji për probleme të rënda me frymëmarrjen. Gruaja kishte ardhur nga Bolonja, një nga zonat e prekura në Itali, ka zbritur në aeroportin e Rinasit dhe më pas ka udhëtuar drejt Durrësit, por një fakt të tillë nuk ua kishte treguar mjekëve.
Pas 3 ditësh pasi ishte kthyer nga Italia ajo është ndjerë keq dhe ka shkuar në spital me këmbët e saj. 75-vjeçarja ka marrë mjekim për pneumoni, ndërsa pas shtatë ditësh gjendja e saj u përkeqësua. Gjatë kësaj kohe siç asaj i kanë shërbyer plot 30 mjekë dhe infermierë.
Kur gjendja u përkeqësua i kanë marrë një tampon për koronavirusin dhe vetëm dje ISHP-ja ka nxjerrë rezultatin pozitiv për të. Burime nga spitali thanë se gruaja u izolua në reanimacion dhe ndodhet në gjendje terminale.
Pas daljes së rezultateve mjekë dhe infermierë në këtë spital janë alarmuar. Mësohet gjithashtu se i gjithë stafi që i ka shërbyer të moshuarës i është nënshtruar analizave përkatëse, rezultatet e të cilave pritet të dalin sot.
