Pak ditë më parë një ngjarje e rëndë tronditi opinionin publik ku 45-vjeçarja Maria Zia Markovska u gjet e vdekur, pranë së cilës ndodhej vajza 9-vjeçare me aftësi të kufizuara. Markovska u gjet e vdekur në banesën e saj ndërsa dyshohet se kishte të paktën tre ditë që kishte vdekur dhe vajza me probleme me elipsinë qëndroi disa ditë pranë trupit të vdekur të së ëmës.
Për të folur për këtë çështje ishte e ftuar mëngjesin e kësaj të marte në “Abc-ja e mëngjesit” psikologia Denada Taçe e cila u shpreh se kjo ngjarje e rëndë duhet të shërbejë si një shembull që shteti t’i kushtojë vëmendje problematikave të tilla.
“Familja ka përjetuar varfëri, vdekjen e babait që ka ndodhur tashmë, gjendja e nënës, ku disa prej elementëve të ngjarjes tregojnë se ka gjasa që ka vuajtur nga depresioni. Kjo nuk është e re në familjet shqiptare, ku fëmijët përjetojnë depresionin e prindërve, papunësinë, varfërinë dhe skamjen apo neglizhenca dhe abuzimi të qëllimshëm që vjen si pasojë e varfërisë. Prindërit që kanë fëmijë me aftësi të kufizuara kufizohet dhe marrëdhënia e drejtë e shërbimit social. Është pjesë e një ngjarjeje që ka patur zhvillim, është zhvillim i hershëm brenda familjes. Më vjen keq ta them se ka patur raste të denoncuara që janë në zonaq të thella, që kanë fëmijë me autizëm, me sindroma të ndryshme dhe punon vetëm njëri prind. Duke parë këtë situatë të ngjashme do të thoja që fatkeqësia e tyre është një shembull që sot t’i tërheqi veshin shtetit për të patur më shumë kujdes për këto familje që nuk kanë asnjë lloj vëmendjeje.”, shtoi psikologia.
Përsa i përket kërkesës së dajës së saj për ta marrë në kujdestari pas kësaj ngjarje të rëndë, psikologia shprehu mendimin se e mitura duhet të merret në mbikëqyrje nga personi i afërt sesa të dërgohet në institucionet përkatëse.
“Nuk jam pro institucionalizimit për sa kohë ka një familjar që interesohet. Konflikti i prindërve apo të afërmve është një konflikt që nuk vë në dyshim dashurinë që ka daja për vajzën. E gjykoj si një nga zgjidhjet më të mira nëse daja është personi që kërkon në mënyrë vullnetare ta ketë pranë.”, tha Toçe.
