Avokati i njohur Spartak Ngjela ka “sulmuar” kryeministrin e vendit Edi Rama, pas takimit të këtij të fundit me Mitsotakis në Greqi.
Ngjela thotë se Rama shkoi në Greqi të bëjë marrëveshje për detin, ndërkohë që kemi të aktivizuar ende “Ligjin e Luftës” me shtetin fqinj.
“E kuptoni kush e drejton Shqipërinë?”, shkruan Ngjela.
Postimi i plotë:
Historia e Shqipërisë, në 100 vjet, e gjitha ka qenë qeverisur nga kryeministra që kanë shitur interesin kombëtar për të fituar postin e kryeministrit. Kjo është e turpshme dhe e dhimbshme njëherësh. Shikoni sesi i kanë vjedhur shqiptarët, i kanë poshtëruar, dhe sërish i votojnë.
E pse të zgjatemi?
Kryeministri aktual i Shqipërisë, Edi Rama, shkon të bëjë marrëveshje për detin me Greqinë, kur kjo ka ligj lufte kundër Shqipërisë.
Pse?
Sepse ka 120 vjet që Greqia kërkon të pushtojë edhe Shqipërinë e Jugut.
Kurse kryeministri shqiptar Rama, ashtu si Kryeministri Berisha, po na flet për një marrëveshje detare, që do t’i japë Greqisë nga territori shqiptar, sipërfaqe të gjerë deti. E pra, Greqisë, pushuesit më të madh të territoreve shqiptare.
Se, ky kryeministër, as vetë nuk e di sesi u gdhi një ditë kryeministër, se sigurisht që, jo vetëm për nivelin e tij, por as për dëshirën që e karakterizon, nuk e mendon dot fare faktin që po kërkon të bëjë marrëveshje detare me një shtet që ka ligj lufte kudër Shqipërisë. Se nuk besoj që e kupton çdo të thotë “ligj lufte” i një shteti kundër një tjetri, i cili është në fqinjësi me të.
E kuptoni se kush po e drejton Shqipërinë?
