Qindra qytetarë të komunës së Hanit të Elezit që nga e diela kanë kërkuar ndihmë mjekësore në QKMF-në e kësaj komune si pasojë e një helmimi, e që dyshohet të ketë ardhur nga uji i pijshëm. Nga dje në orët e hershme të mëngjesit e deri sot në orën 08:00, ndihmë mjekësore në QKMF-në e Hanit të Elezit kanë kërkuar 108 qytetarë.
Kështu ka bërë të ditur, Kimete Kuka, drejtoreshë për Shëndetësi dhe Mirëqenie Sociale në këtë komunë. Ajo ka shtuar se pavarësisht numrit të lartë të qytetarëve që po kërkojnë ndihmë mjekësore situata është e qetë.
“Nga dje në orën 08:00 e deri sot në po të njëjtën orë, ndihmë mjekësore kanë kërkuar 108 qytetarë. Situata është e qetë, të gjithë qytetarët kanë marrë trajtimin mjekësor dhe për momentin nuk kemi asnjë të shtrirë në QKMF”, ka thënë Kuka.
Kuka ka shtuar se numri total i qytetarëve që kanë kërkuar ndihmë mjekësore nga dita e diele e deri sot në orët e para të mëngjesit ka arritur në 190.
Drejtoresha e Shëndetësisë ka thënë se dyshimet janë që helmimi ka ndodhur nga uji i pijes, mirëpo janë në pritje të rezultateve të analizave bakterore.
“Nga analiza fiziko-kimike që janë kryer përveç turbullirës në dy raste rezultojnë brenda parametrave normalë. Tash jemi në pritje të analizave bakterore dhe shpresoj që shumë shpejt do ta kuptojmë se a është si rezultat i ujit apo ka diçka tjetër, sepse dhe ne jemi të shqetësuar”, ka thënë Kuka.
Personat që janë paraqitur për ndihmë mjekësore kanë simptomat e njëjta: barkqitje, vjellje, e temperaturë.
IKSHPK-ja ka rekomanduar që uji që përdoret për pije dhe ushqim të vlohet para përdorimit dhe të mos ndërpritet furnizimi për shkak që mund të përdoret për nevoja të tjera teknike.
Kujtojmë se me një situatë të tillë ishte përballur edhe Komuna e Deçanit në korrik të vitit 2021, ku mbi 1500 qytetarë në QKMF në Deçan kishin kërkuar ndihmën mjekësore e në mesin e tyre edhe 51 fëmijë.
Lidhur me këtë rast Prokuroria Themelore në Pejë, ka ngritur aktakuzë ndaj dy zyrtarëve të kompanisë rajonale “Hidrodrini”.
