Libraritë e shitjes së librave janë ende bosh, pasi nuk ka mbërritur pulla e sigurisë
Sot, është data 5 shtator dhe librat për nxënësit e sistemit 9-vjeçar ende nuk janë gati. Libraritë ku do të duhej të ishin librat në shitje prej datës 25 gusht, kanë vetëm disa libra që ekzistojnë prej vitit të kaluar.
Në fakt, mungojnë shumica e teksteve shkollore, sepse në treg janë vetëm disa prej titujve të disa klasave. Mungon edhe Abetarja e klasës së parë. Ndërkohë, Ministria e Arsimit vazhdon të deklarojë se shumë shpejt do të dalin në treg tekstet që mungojnë. Shitja e librave do të duhej të kishte nisur më 25 gusht, por është vonuar, për shkak se mungon pulla e sigurisë e Ministrisë së Arsimit. Kjo pullë prodhohet nga një kompani private, e cila ka vonuar sjelljen e tyre dhe vënien në dispozion për të mundësuar ndarjen në kohë të librave shkollorë. Vonesat kanë ardhur për shkak të organizimit me vonesë të tenderit, të prodhimit të kësaj pulle dhe kjo ka ndodhur thuajse çdo vit me librin shkollor. Nuk ka asnjë shpjegim nga ministria për arsyet e kësaj vonese. Ndërkohë që këtë vit çmimi i librave është 2 herë më i lartë se një vit më parë. Rritja e çmimit vjen si pasojë e indeksimit.
