Drejtoresha e Qendrës së Shërbimeve Arsimore Rezana Vrapi ka dhënë disa informacione në lidhje me rregullat dhe procedurat që maturantët e këtij viti do të duhet t’u nënshtrohen.
Në një video-mesazh, ajo bën me dije se pavarësisht pandemisë së Covid-19, ‘ka rregulla të administrimit që lidhen me mënyrën se si nxënësit hyjnë në mjedisin e provimit, mënyrën se si ulen, mënyrën se si monitorohen’, ndërsa thekson edhe rregullat më të forta që lidhen me mosmarrjen e celularit dhe moskomunikimin në mjedisin e provimit.
“Rregullat më të forta kanë të bëjnë veçanërisht me besueshmërinë e të gjithë procesit. Pra, mos-marrjen e celularëve dhe mos-komunikimin në procesin e mjedisit. Këto janë të sanksionuara në rregulloren e Maturës Shtetërore. Prandaj bëj me dije: çdo maturant, ditën e provimit të mos ketë celular me vete, të mos komunikojë në mjedis. Në të kundërt, do të penalizohet dhe për 1 vit rresht, ai nuk do të ketë më të drejtë që ta japi këtë provim”, tha ndër të tjera Vrapi.
