Banorët e Laprakës, Paskuqanit dhe Kodrës së Priftit, që prej muajsh janë në protestë kundër shembjes së shtëpive të tyre që preken nga projekti i Unazës së Madhe i zunë derën sot ministres Balluku. Ditën e sotme ata u futën në ambientet e brendshme të Ministrisë së Infrastrukturës dhe Energjetikës dhe ju desh të presin 2 orë e gjysmë për tu thënë që Ministrja nuk është aty. Por megjithatë ata mundën të siguronin një takim për javën tjetër me zonjën Balluku.
“Kemi hyrë në orën 10 dhe kemi dalë në 12:30 nga Ministria e Infrastrukturës. Zotërinjve në fjalë ju nevojiten 2 orë e 30 minuta për të na thënë që Ministrja nuk është këtu, ka dalë në terren. Më në fund arritëm të lëmë një takim për javën tjetër, bëmë një kërkesë me shkrim. Javën tjetër thanë nga e marta ose e mërkura do t’ju mundësohet një takim me zonjën Balluku për të marrë informacion si do të trajtohen ato banesa që preken nga gjurma e Unazës së Madhe. Janë 654 banesa që shemben nga projekti i Unazës së Madhe, nga këto 129 kanë dalë në listën e shpronësimeve të publikuar në Fletoren Zyrtare. Rreth 500 të tjera presin të marrin përgjigje si do trajtohen, banesa që janë në proces legalizimi prej 17 vitesh dhe nuk janë pajisur me një dokument të tillë”.
Qindra banesa planifikohen të shemben si pasojë e projektit për ndërtimin e Unazës së Madhe në Tiranë, shumica e të cilave të palegalizuara, duke lënë mister fatin që i pret mijëra banorë.
