Hall of Fame i futbollit elitar anglez ka dy emra të rinj tashmë në “korridorin” e vet. Fjala është për dy strategë që kanë “rishkruar” ligjet edhe rregullat e kësaj loje të mrekullueshme.
Sir Alex Ferguson dhe Arsène Wenger, trajnerë të përkushtuar të Manchester United dhe Arsenal, bëhen pjesë e Premier League Hall of Fame këtë të mërkurë, njoftoi liga angleze.
Skocezi dhe francezi u bënë trajnerët e parë që iu bashkuan grupit prestigjioz të legjendave, i cili tashmë përfshin lojtarë si Alan Shearer, Thierry Henry, Eric Cantona, Roy Keane, Frank Lampard, Steven Gerrard, David Beckham, Paul Scholes, Didier Drogba, Peter Schmeichel, ose Sergio Aguero.
“Jam i lumtur që jam futur në ‘Hall of Fame’ të Premier League. Është një nder të marr këtë lloj mirënjohjeje,”- tha trajneri skocez tashmë në pension, i cili e bëri karrierën e tij në Premier League në Manchester United, duke ndihmuar klubin të bëhet një nga më i madhi në futbollin anglez dhe atë botëror.
Wenger mori drejtimin e Arsenalit në vitin 1996 dhe gjatë 22 viteve, ai fitoi tre tituj të Premier League, duke përfshirë sezonin ikonik të pamposhtur në 2003/2004. Ai ka arritur 476 fitore në 828 ndeshje, disa nga treguesit që shënuan prezencën e francezit në Angli.
“Unë jam shumë mirënjohës. Unë dua të njihem si dikush që e do Arsenalin,”- tha trajneri për platformat e ligës pas marrjes së vlerësimit.
