Qeveria shqiptare ka shkelur çdo normë ligjore dhe morale duke lejuar që qindra tonë mbetje toksike të nisen nga porti i Durrësit drejt vendeve të tjera. Ndërkohë që institucionet ndërkombëtare dhe grupet mjedisore si EARTH në Tajlandë kanë ngritur alarmin për këtë situatë, qeveria jonë hesht, duke treguar përfshirjen e saj në këtë aferë kriminale.
Si është e mundur që transportimi i oksideve metalike është lejuar pa marrë më parë lejen e portit pritës? Çfarë masash janë marrë për të mbrojtur qytetarët në rast se këto mbetje kthehen në Durrës? Si do të trajtohen këto mbetje toksike në territorin shqiptar?
Sipas dispozitave të Konventës së Bazelit, nëse konfirmohet se janë mbetje të rrezikshme, kontejnerët mund të sekuestrohen dhe të riatdhesohen në Shqipëri. Qytetarët e Durrësit kanë të drejtën të dinë: çfarë do të ndodhë kur këto mbetje të rikthehen? Pse po lejoni që qyteti ynë turistik të shndërrohet në një varr për mbetjet toksike të botës?
Në Tajlandë, drejtuesit mjedisorë kanë refuzuar të pranojnë mbetjet e rrezikshme, duke thënë se vendi i tyre nuk do të bëhet një vendgrumbullimi për mbetjet toksike industriale. Pse qeveria shqiptare nuk merr masa të ngjashme për të mbrojtur qytetarët e saj? Pse janë lejuar këto mbetje të largohen nga Shqipëria pa asnjë kontroll?
Ky është një krim i rëndë kundër qytetarëve dhe mjedisit të vendit tonë. Partia Demokratike është me qytetarët e Durrësit dhe garanton se ne do të ngrihemi në protestë për të ndaluar këtë aferë të turpshme dhe korruptive. Durrësi është në rrezik, dhe ne nuk do të lejojmë që ky qytet të shkatërrohet nga një qeveri e korruptuar dhe e paaftë.
PS: SPAK, ti vazhdo fli dhe mos u merr me këtë krim që po ndodh në Durrës! Detyra juaj është të ndiqni vetëm liderin e opozitës!
/Gijotina.com/
