Një fëmijë 9 vjeç rezulton të jetë zhdukur që prej orës 18:00 të së mërkurës 25 maj 2016.
Zhdukja e minorenit është denoncuar në policinë e Durrësit e cila ka nisur kërkimet për gjetjen e tij. Ndërkohë familjarët kanë vënë në dispozicion një numër telefoni për këdo që mund ta ketë parë atë 06932 91 195.
Familjarët thone se për herë të fundit e kanë parë Brajan Plakun në një qendër interneti në lagjen nr 11 pranë banesës së tyre.
Nëna e 9-vjeçarit, Genta Plaku duke folur në Tv News24 thotë se ai nuk është parë që prej orës 18:00 të ditës së djeshme ku ka qene në një qendër të lojërave Play Station në qendër të Durrësit, te Muzeu i Dëshmorëve në lagjen nr.9.
Nëna e tij tha se ajo së bashku me bashkëshortin ishin në një ceremoni mortore, dhe djali pas shkollës ka shkuar të luajë te lagja në këtë qendër lojërash kompjuterike. Të shqetësuar për moskthimin e të birit në shtëpi, të dy prindërit kanë nisur kërkimin për ta gjetur tek të afërmit dhe të gjithë shokët e vogëlushit, por nuk kishte asnjë shenjë, dhe rreth orës 21:00 kanë bërë denoncim në Komisariatin e Policisë së Durrësit. Vogëlushi Brajan Plaku është nxënës i klasë së tretë dhe prindërit e tyre luten që kushdo që ka informacion mbi vendndodhjen e tij, të kontaktojë në numrin 069 32 91 195.
“Më ka humbur djali që dje në orën 6 të darkës dhe nuk po e gjej asgjëkundi. Është parë tek një play station. Ka dalë me një shokun e tij, por atë e ka marrë gjyshi dhe ka ikur me të. Shkuam në shtëpinë e tij po ishte e mbyllur. Nuk e gjejmë asgjëkund. E kemi parë në kamera që ka ikur nga play station. Nuk kemi konflikte me askënd. Del luan dhe vjen në orar si gjithmonë, nuk na ka thënë për ndonjë shqetësim. Është një fëmijë që ka frikë e trembet shumë. Nuk rri kurrë kur errësohet. Ka frikë natën. Si mund ta kalojë vetëm natën?! Kush ta ketë parë të na njoftojë. Jemi njerëz të thjeshtë nuk kemi asnjë konflikt. Unë punoj në rrobaqepësi, burri pa punë, merret me fëmijët. Dje kishim një rast vdekje të afërm dhe nuk ka shkuar ta marrë në shkollë”, ka thënë mes lotësh nëna e djalit. Pas denoncimit, policia e Durrësit ka nisur kërkimet për gjetjen e të miturit dhe ka marrë në pyetje banorët dhe persona që mund ta kenë parë të fundit.
