Policia e Durrësit ka arrestuar një 46-vjeçar, i cili është dënuar nga drejtësia italiane me 26 vjet dhe 10 muaj burg për trafik droge.
Specialistët e Seksionit për Hetimin e Narkotikëve në Drejtorinë Vendore të Policisë Durrës, në sajë të një bashkëpunimi të ngushtë midis drejtësisë Italiane dhe asaj Shqiptare, kanë bërë të mundur ndalimin e shtetasit në kërkim ndërkombëtar Nek (Skënder) Driza, 46 vjeç, banues në Shijak.
“Ndalimi i tij u bë pasi Gjykata e Shkallës së Parë Durrës me Vendimin Nr 273, datë 26.04.2016 ka caktuar masën e sigurisë “Arrest me burg”, për efekt të njohjes së Vendimit Penal të Gjykatës së Apelit L’ Aquila në Itali, e cila e ka dënuar me 26 vite e 10 muaj burg për veprën penale trafikimi i narkotikëve”, informon policia.
Materialet i kaluan Prokurorisë së Rrethit Gjyqësor Durrës për veprime të mëtejshme.
