E shihni këtë foto? Është një nënë nga periferia e Tiranës që shet barishte nëpër trotuarët e Tiranës. E veçanta e saj ështe se ajo është duke lexuar një libër, ndërkohë që pret të shesë ndonjë nga produktet e kopshtit të saj në fshat. Është një pamje e pazakontë kjo. Ka një motiv të fortë që e ka çuar të lexojë gjatë kohës kur ajo pret të shesë ndonjë dorë barishte nëpër trotuarët e Tiranës. Librin e ka shkruar i biri i cili jeton prej 15 vitesh në Kanada.
Kjo pamje interesante i ka tërhequr vëmëndjen ish-studentit të dhjetorit Bislim Ahmetaj, i cili është afruar dhe e ka fotografuar, sigurisht me leje. Ahmetaj e shoqëron me këtë mesazh fotografinë shumë interesante.
“Filozofia që përcjell kjo foto vlen shumë më tepër se reforma në drejtësi, vlen njëmijë herë më shumë se të gjitha fjalimet që mbajnë udhëheqësit politik të enjten në parlament apo gjatë gjithë javës nëpër tribuna të ndryshme. U emocionova aq shumë kur e pashë këtë nënë që ulur mbi një gurë, me katër-pesë duar barishte përpara po lexonte një liber. Ju afrova dhe i kërkova leje ta fotografoj, Ajo më tha : Jo të keqen nana se ju na i qitni në internet fotografitë e masanej vinë policat e s’na lanë me shitë. Kur e pyeta se çfarë libri po lexonte. Ajo mu pergjigj me një ofshamë dhimbje që i doli nga thellësia e shpirtit: E ka shkruar im bir që jeton tash 15 vite në Kanada… Më la pa fjalë, doja t’ja blija gjithe barishtet qe kishte shtruar mbi trotuar por per fat te keq isha nisur për një takim dhe koha s’ishte me mua…shpresoj ta shoh prapë dhe tja blej atë metër katror me barishte në trotuarin pronë e pushtetit dhe jo e publikut”, shkruan Ahmetaj.
