Gazetari Eni Shehu është larguar me forcë nga ambjentet e teatrit nga drejtori Ervin Çuli
Gazetari i “Abc News”, Eni Shehu, është sulmuar fizikisht nga drejtori i teatrit Kombëtare Hervin Çuli. Gazetari Shehu ishte në grupin e gazetarëve të ftuar në premierën e shfaqjes “Tri Motrat” dhe në pushimin e shkurtër mes akteve të shfaqjes, është sulmuar fizikisht dhe kërcënuar, nga drejtori Hervin Çuli, së bashku me asistentët e tij. Më pas ata kanë nxjerrë gazetarin Shehu, jashtë godinës së Teatrit Kombëtar. Lidhur me këtë ngjarje, “Abc News” i kërkoi kryeministrit Rama dhe ministres së Kulturës, Kumbaro, shkarkimin e menjëherëshëm nga detyra të drejtorit të Teatrit Kombëtar, Hervin Çuli.
Ndërsa Teatri Kombëtar ka reaguar përmes një njoftimi për mediat ku jep versionin për ngjarjen. Në këtë sqarim pretendohet se gazetari Eni Shehu provokoi dhe shqetesoi me fjalë e batuta aktorët gjatë interpretimit në skenë duke zhurmuar, qeshur, trazuar ata dhe mjedisin përreth. “Pa asnjë respekt për shfaqjen, për mundin e aktorëve, për artin dhe teatrin, pa asnjë respekt për publikun, personi në fjalë bëri gjithçka për të prishur shfaqjen. Kjo na detyroi që gjatë pushimit t’i kërkojmë atij të largohet nga salla, dhe në refuzim të kësaj kërkese ta detyrojmë të largohet”, theksohet në sqarimin e Teatrit Kombëtar.
