Drejtorët e Veliajt firmosin çdo tender edhe kur është në shkelje të rregullave, sepse kjo qenka pjesë e kontratës së tyre me kryetarin. Këta rrezikojnë të akuzohen nga SPAK, ndërsa kryetari thotë se “nuk di gjë”. Ndoshta ky ka qenë pakti i ish nënkryetares së bashkisë me kryetarin. Pasi kaloi në krye të Agjencisë së Parqeve dhe Rekreacionit, Anisa Ruseti, ka firmosur plot tendera që nuk përputhen me ligjin.
Së fundmi, janë dy prokurime që skuqin nga shkeljet, për blerje vaj lubrifikante, bateri dhe goma për makinat që ka në dispozicion kjo Agjenci.
Njëri nga prokurimet ka si objekt ‘BLERJE GOMA DHE BATERI”. Në dokument nuk përcaktohet sa makina kanë nevojë për pajisje të reja, por është parashikuar të blihen 54 goma dhe 29 bateri. Ndërsa janë dhënë 19 milionë lekë.
Në fakt për transparencë duhej specifikuar, se cilat automjete kanë nevojë goma të reja dhe nëse është nevojë urgjente. Ndërkohë, ky prokurim është mbyllur pa garë. Për këtë rast ishin dorëzuar dy oferta, por ajo e kompanisë Besnik Meçi” shpk u skualifikua që në fazën e parë me argumentin se nuk ka plotësuar kritere të veçanta.
Meqenëse mbetet vetëm një ofertë, në këto kushte procedura duhej anuluar, ndërsa drejtorja Ruseti e ka dhuruar kontratën. Firma Auto Manoku Servis u shpall menjëherë fituese në tetor dhe më 12 nëntor 2024 është bërë publik formulari i fituesit paraprak.
Open Data Albania e ka vlerësuar tenderin me “Flamurin e Kuq”, që është shenja e riskut të korrupsionit.
Dy flamuj të Kuq
Në të njëjtën datë është firmosur edhe tenderi me objektin ‘Vajra dhe lubrifikant për automjete’ që ka fondin limit 14 milionë lekë.
Fillimisht janë dorëzuar 5 oferta, por në garën finale kaloi vetë njëra prej tyre me asnjë konkurrent përballë. Kjo për faktin se 4 ofertat janë fshirë nga komisioni që në fazën e parë me argumentin se kanë mungesë dokumentacionesh. Në fakt, bazuar në ligj ky argument nuk qëndron plotësisht për të eliminuar të gjitha ofertat, pasi rregulli kërkon që operatorët të vihen në dijeni për mungesat dhe t’u lihet mundësia për plotësimin e tyre.
Vetëm nëse brenda afatit nuk merret asnjë reagim nga operatorët atëherë duhet të skualifikohen.
Por, sërish procedurat e tenderit nuk duhet të vazhdonin pa konkurrent. Gjë të cilën drejtorët e Veliajt e bëjnë në shumicën e prokurimeve. Kështu, e favorizuar këtë herë ishte kompania “TOP-OIL” me ofertë sa 100% e fondit limit, që përbën një tjetër shkelje.
Më 12 nëntor 2024 është bërë publike kontratat që mban emrin e firmës “TOP-OIL” me pronar Luana Saraçin. Kështu u ngrit edhe një tjetër “Flamur i kuq” brenda një dite! Saraçi nuk është i panjohur për Veliajn, së bashku gëzojnë shumë bashkëpunime në tenderat e dhënë nga Eco Tirana. Më e fundit regjistrohet në korrik 2024, kur Eco Tirana përmes një tenderi abuziv bleu 129 milionë lekë graso tek Saraçi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
