Për kreun e LZHK-së, Dashamir Shehi është shfaqur ditën e sotme kundër tre nga figurat kryesore të politikës shqiptare, që pritet të udhëheqin aksionin opozitar të së ardhmes, Sali Berisha, Ilir Meta dhe Lulzim Basha.
Në ABC, Shehi deklaroi se nuk mund ta ndërtojë profilin e të ardhmes opozitare mbi Metën, ndërsa shtoi se ai duhet të qëndrojë në detyrë deri në përfundim të mandatit.
“Unë do të thoja Meta ka qenë gjithmonë një lloj zig zage nga njëra anë në anën tjetër. Por nuk mund ta ndërtoj profilin e të ardhmes opozitare mbi Metën. Unë them presidenti duhet të rrijë në detyrë deri në qershor kur e ka detyrën. Unë dua të mbroj funksionin e presidentit. Meta është bërë president me votat e socialistëve të cilët thonë tani nuk po i zbaton urdhrat tona”, deklaroi Shehi.
Kreu i Lëvizjes për Zhvillim Kombëtar Dashamir Shehi deklaroi se Lulzim Basha dhe Sali Berisha e kanë mbaruar ciklin e tyre në politikë.
Shehi theksoi se ata po mbrojnë interesat e tyre. Sipas Shehit, nëse vetë do e donin Partinë Demokratike, Basha dhe Berisha do duhet të ishin larguar për t’i hapur rrugën të rinjve.
“Unë i gjykoj që nuk mund të japin më kontribut. Janë gjëra të provuara dhe të stërprovuara. Ndjekës ka, do ketë çdo herë. Ne raportin e kemi me qytetarin shqiptar që duhet të votojë për rrëzimin e Edi Ramës. Unë gjykoj që këto personazhe e kanë bërë ciklin e vet. Këta po mbrojnë territorin e vet, asgjë më tepër. Debati në PD është një gjë e mirë. Por tani të vetëgënjehemi se kjo është zgjidhja, kjo nuk është e sinqertë.
Këta po mbrojnë interesat e veta. Në Shqipërinë e vitit 2022 nuk mund t’i kërkosh rinisë ose duhet të jesh me menshevikët ose me bolshevikët. Për mua kjo nuk është rruga për të rrëzuar Edi Ramën. Po ta donin kaq shumë PD le të bënin një sakrificë të vogël dhe t’i hapin rrugë të rinjve. Po ma gjetët një tezë politike nga ato që po thonë këta zotërinjtë. Konservatorizmi nuk e di ku konsiston”, tha Shehi.
