Konferenca e kryetarëve nuk ka përfshirë në kalendarin 3 javor draftin për reformën në drejtësi. Ky vendim është marrë sot nga Konferenca e Kryetarëve. Ndryshe nga sa pritej, paketa e ndryshimeve kushtetuese s’do të mbërrijë për votim në Kuvend brenda muajit qershor, siç edhe ishte afati i vendosur nga ndërkombëtarët.
Dështimi i negociatave mes Edi Ramës dhe Lulzim Bashës gjatë takimit të ditës së hënë, bëri që kreu i qeverisë të deklaronte dërgimin për miratim në Kuvend të paketës me ndryshimet kushtetuese. Nga ana tjetër, opozita ka paralajmëruar se çdo draft pa konsensus në Kuvend, është i destinuar të rrëzohet.
Të njëjtit apel i janë bashkangjitur edhe Ambasada e SHBA-së dhe Zyra e Bashkimit Evropian një ditë më parë, të cilët kërkuan votimin e reformës në drejtësi në Kuvend, ndërsa akuzuan opozitën se nuk ka treguar fleksibilitet gjatë negociatave Rama-Basha.
