Grupi parlamentar i PD, të cilët janë pro përfshirjes së diskutimeve për zgjedhjen e kreut të ri të Shtetit, i cili do të pasojë në këtë detyrë Ilir Metën, ditën e djeshme kanë përgatitur një draft të cilin do ja paraqesin si propozim mazhorancës.
Në draftin e propozuar nga grupi i PD, parashikohet se si duhet bërë zgjedhja e kreut të ri të shtetit dhe si duhet vepruar në çdo raund.
Sekretarja e Përgjithshme e PDIU, Mesila Doda ka reaguar lodhur me këtë draft. Përmes një postimi në Facebook, Doda shprehet se ka koncepte që i bashkë-ndajnë me opozitën.
Por teksa PD kërkon një President jo politik, Doda shprehet kundër. Sipas saj, nëse ka një post ku nevojitet një person politik ai është posti i Presidentit.
Postimi i plotë
U njoha nga mediat mbi draftin e përgatitur nga z. Alibeaj e besoj që në draft ka koncepte që i bashkëndajmë.
Së pari, Kushtetuta shprehet qartë që Presidenti si kreu i shtetit dhe përfaqesuesi i unitetit të popullit duhet të marrë mbështetjen e shumicës së cilësuar dhe është e detyrueshme të kërkohet konsensusi në parlament. Se cilat janë formulat e përzgjedhjes mund të diskutohet po është e rëndësishme të theksojmë se konsensusi është i detyrueshëm nga Kushtetuta e jo një opsion për maxhorancën. Perndryshe do kishim vetëm një president si zgjidhje e krizës parlamentare por jo përfaqesues i unitetit të popullit.
Seë dyti dhe kjo është po ashtu shumë e rëndësishme, nuk e kuptoj se përse kemi tendencën që të perjashtojmë politikën nga presidenca… nëse ka një post për exellencë, ku nevojitet një person politik është ai i presidentit. Askush nuk mund të paragjykojë e të përjashtojë politikën nga Presidenca. Ka midis nesh, nga e majta dhe e djathta, shumë personalitete që e përmbushin përfaqesimin më të gjerë se forcat e tyre politike. Duhet të respektojmë profesionin tonë dhe të pranojmë që ka mes nesh personalitete që meritojnë besim dhe respekt, prerogativa të cilat posti i Presidentit i ka të detyrueshme.
Mbetëm e mendimit për një president që vjen nga politika dhe është i pranueshëm për të gjitha palët.
