Ish oficeri i krimeve të rëndë në Elbasan, Krenar Guci do të merret në pyetje nga Prokuroria e Posaçme.
Në dosjen e Nuredin Dumanit, dhe telefonin e tij është gjetur një foto e ish oficerit.
Burime bëjnë me dije, se oficeri i policisë është paraqitur pranë SPAK , disa ditë më parë dhe është marrë në pyetje, nga prokurorët që po hetojnë dosjen “Dumani”.
SPAK tregohet mjaft i rezervuar se në çfarë cilësie është marrë në pyetje oficeri i policisë, por sipas informacioneve ai është pyetur nëse ka pasur konflikte apo kërcënime në kohën kur ka ushtruar detyrën e shefit të Krimeve në Elbasan.
Rreth një muaj më parë Guci, u pajis me urdhër mbrojtjeje. Fakti që në celularin e Dumanit u gjet fotoja e oficerit, shtyu hetuesit të dyshojnë se ndaj tij mund të kishte porosi për atentat.
Për këtë, prej gati një muaj, tashmë familja e ish-shefit të seksionit për hetimin e krimeve të rënda në Policinë e Elbasanit është marrë në mbrojtje, ndërsa vetë oficerit i është vendosur një roje personale.
