Hetimet e Prokurorisë së Posaçme kundër Korrupsionit dhe Krimit të Organizuar (SPAK) ndaj zv/kryeministres së pezulluar Belinda Balluku kanë hyrë në një fazë të re, me marrjen në pyetje të disa biznesmenëve që kanë përfituar fonde publike përmes tenderave të fituar në lote të ndryshme të ndërtimit të Unazës së Madhe.
Sipas burimeve, faza e pyetjeve ka nisur menjëherë pas kontrolleve të ushtruara në bizneset përkatëse dhe sekuestrimit të aparateve telefonike dhe pajisjeve kompjuterike. Një pjesë e këtyre pajisjeve është kqyrur, ndërsa të tjera janë dërguar për ekspertim në laboratorin e ekspertizës kibernetike pranë SPAK.
Biznesmeni i parë i thirrur për të dëshmuar ka qenë Ram Geci, i cili u paraqit në SPAK javën e kaluar dhe u mor në pyetje nga një oficer i Byrosë Kombëtare të Hetimit. Ndërkohë, në pritje të fletë-thirrjeve janë edhe biznesmenë të tjerë që, sipas hetimeve, kanë zhvilluar takime apo komunikime me Ballukun në kohën kur ajo drejtonte Ministrinë e Infrastrukturës dhe Energjisë.
Lista e personave që pritet të thirren për të dëshmuar përfshin emra si Sindi Dushku, drejtoresha e kabinetit të Ballukut, Sadik Ismailaj i kompanisë “Alb-Star”, Pëllumb Salillari, Ilir Shtufi, Gëzim Dani, Paqsor Buzi, Ylli Senka, Kujtim Arifaj, si dhe Bledar Starova, Eduart Çohadari, Ardit Metaliaj, Iljan Metaliaj, Çuman Sejdiaj, Gramos Dalipi, Bledar Lloshi, Giovanni Pascale, Vladimir Pjetërgjokaj, Enea Kaçi, Basri Troci, Besmir Çako, Ervis Toska, Ergys Senka, Spartak Demiraj, Leonard Proko, Arbër Abazi dhe Artan Sako.
Sipas burimeve pranë prokurorisë, këta persona kanë përfituar tendera në ministrinë që drejtohej nga Balluku, ndërsa në disa raste dyshohet për takime me qëllim ndarjen e loteve për punimet në ndërtimin e Unazës së Madhe. Aktualisht, asnjë prej biznesmenëve të përmendur nuk është marrë zyrtarisht nën hetim.
Ndërkohë, SPAK ka marrë zyrtarisht të pandehur Belinda Ballukun për akuzat që lidhen me paracaktimin e fituesve në tenderin e Tunelit të Llogarasë dhe për shkelje në shtatë procedura që lidhen me dosjen e Unazës së Madhe. Më 31 tetor, ndaj saj u caktua masa e ndalimit të daljes jashtë shtetit dhe pezullimi nga detyra si ministre dhe zv/kryeministre.
Pas përplasjes institucionale me qeverinë në Gjykatën Kushtetuese, SPAK ka kërkuar nga Kuvendi autorizimin për arrestimin e saj. Kërkesa ende nuk është shqyrtuar, pasi Komisioni i Mandateve e ka shtyrë disa herë mbledhjen përkatëse.
